Inthlan a hnai zel a, campaign theih hun chhung pawh a tawp tep tawh a; ni hnih tha awrh chauh a awm ta. Political party hrang hrangin sawrkarna an siam huna ram an kaihhruai dan tur an puangzar vek tawh a, candidate tinte pawhin mahni bial an enkawl dan tur leh hma an lak dan tur an puangzar theuh tawh a, mipui lam pawhin an hre bel hle tawhin a rinawm.
Social media a chak tawh a, mi tinin kutphah bawr atangin chanchinthar kan hriain kan thlir thei vek tawh a; kan ram politics dinhmunah pawh mahnia ngaihdan siamna khawp information kan dawng thei tawh a tih theih awm e.
Mita kan hmuh leh benga kan hriatte hmangin duh kan thlang dawn a ni a. A then chuan sawrkar tura an duh an thlang ang a, a then chuan sawrkar tura an rin an thlang bawk ang; chu chu mimal zalenna a ni.
Voter-te hian, sawrkarin mahnia ngaihdan siam thiam chin, thutlukna siam thei china a ngaihte kan nih ang ngeiin, rilru fim tak hmanga inthlan hi kan hmachhawn a pawimawh dawn hle.
Tunhma deuha inthlan kan hmachhawn thin danah khan, ‘duhzawng’ aiin ‘rinzawng’ kha a buk a rit deuh thin niin a ngaih theih. Party thawm na deuh kha chu chaka rin a ni deuh thin a, duhzawng leh tha tihzawng neite pawh khan, ‘an chak chuang lovang’ tih ngaihdan avangin ‘duhzawng’ aiin ‘rinzawng’ lam kha a buk a rit leh mai thin.
Khatiang kalphung kha tunah chuan kan kalsan ve ta niin a lang. Miin mahni zahawmna, dikna leh chanvo ngaihhlut nachang kan hre tawh a, midang thuhnuaia kun lova, midang ngaihdana innghat mai lova, mahni duhthu ngeia mahni duhzawng ngei thlang thei turin kan inbuatsaih thei tawh a tih theih awm e. Chutiang rilru pu chung leh, tihtakzeta ngaihtuahna seng chunga vote kan thlak phawt chuan, chu chuan rah tha zawk a chhuak ngeiin a rinawm.
Vote thlak hi khua leh tui mawhphurhna leh tihtur a nih piah lamah, mahni dinhmun atana ro kan relna a nih nghal bawk avangin, urhsun leh uluk taka ngaihtuahna kan sen hi kan tihtur leh mawhphurhna a ni tel nghal tih kan hriat nawn a duhawm hle a ni.
Rinzawng nge duhzawng?
