Dolly Parton hming hi rimawi khawvelah chuan a dai tawh lo vang, mahse, US album chart, Billboard 200 a No.1 kai thei album a la nei tlat lo. Rimawi khawvela kum 60 dawn a inhman tawh chhung hian award chi hrang hrang dawng tawh mah se he chart-a No.1 album ber hi a la neih tlat loh avangin eng emaw ti takin a kim lo ru riau. Tunah chuan a album thar ‘Rockstar’ hmangin a No.1 thei dawn em tih chuan ngaihven a hlawh ta a ni. Hetihrual hian Drake leh Taylor Swift te huhang a la lian hle tho mai a, hei hi rawn sutlang zo tak maw!
Dolly Parton hian a rimawi zinkawnga a hun tam zawk chu country music tan a hmang a, mahse, Rock and Roll Hall of Fame-ah lakluh a ni ta rup mai a, tunah chuan a rock album hmasa ber record-in, he album hian a la thlen ngai loh ram a thlen tir theih beiseina a awm ta a ni.
Hla 30 awmna ‘Rockstar’ album-ah hian hla thar bakah hla hlui a cover te pawh a tel a, a cover ho-ah hian Sting, Steven Tyler, Debbie Harry, Rob Halford, Elton John leh Miley Cyrus hla te pawh a tel. ‘Rockstar’ hi Dolly Parton studio album 49-na niin, November ni 17 khan a tlangzarh a, album 49 tlangzarh tawh mah se Billboard 200 chart-ah hian top 10-ah tum hnih chiah a la lang.
‘Rockstar’ hmangin Dolly Parton-i’n Billboard 200 a No.1 kai thei album a nei ve thei tawh ang em?
