Taylor Swift larna hian a chim chin a zau khawp mai a, khawvel milar dangte pawhin thlalakpui hi an chak riau thin. Zurich-ah July ni 9-a Eras Tour a neih tum pawhin tennis legend Roger Federer-a’n backstage-ah titi puiin, thla te a lak pui a, Roger hian a Instagram lamah tar chhuakin, Swiftie a nih thu te a puang ve leh ta tlat mai.
An thlalak hi Taylor Swift zawkin a hmeh (lak) niin a lang a, Federer pawhin VIP badge a la awrh ran a, camera lam hawiin a nuih dan ‘cial ngei maiin a’n nui ngei-ah! Taylor Swift pawhin a show khar nana a thawmhnaw hak a la inthlak hman bik lo a, ani pawhin camera lam hawiin a nui sak e.
Thlalak hi Roger Federer hian a Instagram-ah tar chhuakin, “Tunlai chu ka Swiftie ve tlat,” tiin a emoji hman atang pawhin Swiftie ni a a insawi hi a fiamthu mai mai lo tih a hriat theih e. A emoji hman te hi Swift album 11 nena inzawmna nei vek a ni a, a hmasa ber phengphehlep pawl hi Swift album hmasa ber entirna a ni a, a dawt chiah a hand heart hi Fearless album, purple heart hi Speak Now album, scarf hi Red album, khawpui lem (cityscape) hi 1989 album, rul lem hi Reputation album, pierced heart hi Lover album, mirrorball hi Folklore album, thingkung lem hi Evermore album, sana lem hi Midnights album leh white heart hi The Tortured Poets Department album entirna te a ni.
Taylor Swift hian Switzerland-a Letzigrund Stadium-ah zan nih show neiin, July ni 10 zanah a zo a, Milan lam pan lehin, San Siro Stadium-ah zan nih show a nei leh dawn a ni.
Roger Federer a Swiftie
