Ningani zan khan Italian Serie A-ah inkhel pathum a awm a. Jose Mourinho enkawl AS Roma chu Genoa hneh lovin an tlawm leh tawh a. Manager lar Mourinho hian a club enkawl tawh zawng zawngah season thar bul a tan chhiat ber hun a tawng mek.
Roma hi Genoa hmachhawn turin Luigi Ferraris-ah an leng lut a, mikhual an nihna hmunah bul an tan chhe hle. Inkhel tan atanga minute nganna lekah Albert Gudmundsson chuan Genoa hmahruaina goal a thun nghal a, Roma in goal an chhuah hma hle. Goal chhuah hma viau mah se Roma an insiamtha thuai a, minute 22-naa Bryan Cristante goal thun hmangin an si phurh an sut.
Hma taka goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Chawlhlawk dawn hnaihah mualneitu an che fuh nawn leh a, minute 45-naah Mateo Retegui chuan hma an hruai nawn lehna goal a thun a, 2-1 hmahruai chungin chawlhlawk an hmang.
Chawlhlawk hnu lamah Genao an khel tha chhunzawm a, goal hnih an thun belh leh. Minute 74-naah Morten Thorsby chuan an goal thumna thunin an hmahruaina a tizau a. Minute 81-naah Junior Messias chuan an goal lina thunin, an chakna a nem nghet a, an mualah ngei 4-1 in an chak zui ta a ni.
Genao lakah an tlawm leh tak vangin Roma hian khelh ruk atangin point nga chiah an la hmu a, 16-na daihah an awm tawh. Season tharah Mourinho team te hi vawi khat chiah an la chak a, draw vawi hnih neiin, vawi thum ngawt tlawm zawkah an tang tawh. Porto, Chelsea, Real Madrid, Inter Milan, Manchester United leh Tottenham lo enkawl tawhtu Jose Mourinho hian AS Roma-ah bul a tan tha viau a, Europa Conference League-ah champion hmasa ber a nihpui a. Kum 14 zet hnuah a vawi khat nan trophy a lakpui. Season liam ta khan Europa League final a hruai thleng leh naa, an champion zo ta lo thung. Season liam ta khan Serie A-ah parukna a nih pui hram a. Beiseina sang tak nen season tharah bul tan mah se, season a tan chhiat ber tum a tawng ta tlat thung.
Roma an tlawm leh tawh
![](https://theaizawlpost.org/wp-content/uploads/tap_logo-min-large.jpg)