Roma-in an manager an ban
Pathianni khan match 12 chhung chiah team a la kaihruai hman tihah Ivan Juric chu amah ruaitu AS Roma-in an petchhuak leh ta a, tun hi season liamta vawi 10 chhunga manager an ban vawiriatna a ni tawh.
Roma hi Pathianni khan an mikhual Bologna lakah 3-2-in an tlawm a, Roma khaw club thuneitute thinin a tuar leh ta lo a, season kal laia a vawithumna atan head coach thar an zawn leh a ngai dawn ta a ni!
Kum 49 mi Croatian Juric hi September thla mai khan Jose Mourinho chhuah hnua thlariat chauh team enkawl hman Daniele de Rossi thlaktu atan an senglut a; Torino leh Hellas Verona manager hlui hnuaiah chuan match 12 an khel tling a, vawili chakin, vawinga an tlawm a, an inban zui leh ta nge nge a nih hi!
Roma neitu The Friedkin Group thuchhuah chuan tunhnai chawlhkar liamta engemawti chhunga a thawhrimna avangin Ivan Juric chungah lawmthu an sawi a, head coach thar zawn hna an \an leh nghal thu nen!
Everton lei tuma dawr mektu The Friedkin Group an tih hian Saudi Arabia head coach nihna chawlhsan ta Italy leh Manchester City manager hlui Roberto Mancini lam kha an hawi na ber rih nia hriat a ni.
Roma hi Serie A table-ah 12-na niin, Europa League lamah phei chuan 20-na daih luahin, point khat chauhin tlakhniam theihna hmun a dang tawh!
Roma-in an manager an ban
