Pathianni khan boxing-ah inhnek ngaihven hlawh tak a awm a. Texas a inhnek hmuhnawm takah Ryan Garcia chuan a khingpui Oscar Duarte chu knockout in a hneh. Duarte knockout tu Garcia hian WBA light-welterweight champion Rolando Romero cho zuiin, title fight hmachhawn a duh thu a sawi.
WBA light-welterweight huanga hming chher lian hman tak Ryan Garcia hian April thla khan a vawi khat nan hneh loh a tawng a, a khingpui Gervonta Davis a hneh lo. Davis a hneh loh hnua inhnek a hmachhawn hmasak berah Oscar Duarte hmachhawnin, fiahna hautak a hmachhawn. Duarte nen hian inhnek hmuhnawm an lantir a, round sarihna tawp thlengin chak tur zawk rin thiam an la har hle. Round riatna tir lamah round dang ang bawkin Duarte-a’n a khingpui a nawr a, round riatna tawp lamah a chesual ta tlat thung. Ryan Garcia hian amah pan char chartu Duarte hi fuh zetin a hnek fuh a, rang taka hnek fuh zawnin a hnek tlu. Tlawm hreh viau mah se referee in vawi 10 a chhiar thlengin Duarte a ding ngil thei lo va, a trainer thar hnuaiah a vawi khat nan a tlawm zui ta a ni.
Kum 25 mi Ryan Garcia in boxer tha a nih a lantir zui zel a, inhnek vawi 25 hmachhawn tawhinm vawi 24 a chak a, a hneh tawh mi 20 zet a knockout. A khingpuite a knockout theih viau laiin tlawm zawkah vawi khat a tang ve tawh thung. A khingpui Oscar Duarte khan professional huangah inhnek vawi 29 a hmachhawn tawh a, vawi 26 chakin, vawi hnih a tlawm, draw vawikhat a nei bawk. Mi 26 a hneh zingah 21 a knockout.
Duarte laka a chak hnuin Garcia chuan world champion ni tura a kir thu a sawi a. WBA light-welterweight champion Rolando Romero nen inhmachhawn ngei a duh thu sawiin, an inhmachhawn hun hunah a kawnghren a laksak tur thu a sawi tel bawk. Anni pahnih hi an inhnek a nih chuan WBA light-welterweight huanga inhnek ngaihven hlawh tak a ni ngei ang.
Romero hmachhawn duh Garcia
