Ronaldo club hnuhnungber tur Al Nassr
Youtube channel a siam atanga ni hnih lek chhunga subscriber maktaduai 41 tehreng nei tling Cristiano Ronaldo chuan a khawsak mekna Saudi Pro League club Al Nassr chu football khelh a bansan hmaa a club tawp berna tur a nih tawh thu tunhnai khan a sawichhuak hlawl!
Arab team tan game 67 khela goal 61 thun tling tawh Portugal international hian Manchester United chhuahsanin January 2023 khan Saudi Pro League club hi a zawm a, a career bul a tanna Sporting Lisbon-a kirleh tur leh chu hmun ngeia a ballboot tunghul ve tawh tura sawirik a nih mek laiin Portuguese TV channel Now-ah a dinna a sawichiang.
Kum 39 mi ni ve taw chuan, “Ka chawl ve thuai tawh dawn em tih ka la sawi mai thei rih lo a, kum hnih thum thlengte pawh ka la inkhel mai thei a, tun dinhmuna thu chiang ka sawi theih awmchhun chu he hmun Al Nassr-ah ngei hian ka chawl (retire) dawn. He club-ah hian ka hlim a, he ram pawh hian ka lung a tiawi a, Saudi Arabia-a inkhelh hi ka hlimpui a, chhunzawm zel ka duh a ni,” a ti tlat!
Real Madrid leh Juventus forward hlui hian a career-ah goal 898 zet khawl tling tawhin, chu’ng zinga goal 130 chu Portugal ram tana a khung a ni a, kum 40 hnaih tawh hle mah se international football pawh la chhunzawm zel a duh thu sawiin, “National team ka chawlhsan dawn a nih pawhin tu mah hrilhlawk ka tum lo a, ka thutlukna liau liau a ni ang.
“Tun dinhmunah chuan kan match khelh chhoh leh tur hoah hian national team puih rih ka la duh a ni. Kan hma lawkah hian Nations League-in min hmuak a, ram tana la inkhelh rih hi ka duh a ni,” a ti.
September ni 5 mi hian Portugal-in Croatia anmikhual dawn a, nithum hnuah Scotland mikhual zui lehin, October ni 12-ah Poland an tlawh ang a, October ni 15-ah Scotland an luhkhung zui leh ang.
Tunhnaia an kawmnaah Ronaldo hian inkhelh bansan huna manager nih tumna rilru a la put loh thu sawi bawkin, a kawng zawh tur lam hriat theih a la ni rih lo a; official channel lam a buaipui dawnte pawh a ni mahna!
Champions League-a a thawhhlawk avanga Uefa president Aleksander Ceferin kut atanga special award dawng tur Ronaldo hian Europe club inelna sangberah game 183 khelin goal 140 a thun tling a, he competition-a goal khung hnember (all-time leading goalscorer) ni mekin, fooball mimal chawimawina ngaihhlut hlawh Ballon d’Or pawh vawiruk ngawt a dawng tawh a; Champions League-a goal khung tam lamah amah hnaihbertu Lionel Messi aiin goal 11-in a sang a, pathumna ni mek Barcelona striker Robert Lewandowski lakah goal 46-in a chungnung bawk.
Portuguese superstar hian UCL trophy vawinga dawng tawhin, vawikhat Manchester United tan a ni a, a dang zawng Real tan.
Ronaldo club hnuhnungber tur Al Nassr
