Ronaldo goal 100-nain Al-Nassr tlawm tur chhan zo lo!

Ronaldo goal 100-nain Al-Nassr tlawm tur chhan zo lo!
Inrinni khan Hong Kong khawpuia Saudi Super Cup final-ah Cristiano Ronaldo chuan mellung thar phun belh lehin, a first-half penalty chhuihluh hmang khan Ryadh khaw club tan goal 100 a thun tling chiah a, mahse, kha goal khat khan an hmelma lian Al-Ahli laka a team vawn lai Al-Nassr tlawm tur a dang zo ta chuang lo!
Portuguese star hi club hrang thiau pali tana goal 100 chin thun tling vek thei player hmasaber niin, a career-ah goal 939 a khawl tling chiah a, goal 1000 puitlin turin goal 61 chiah a mamawh ta!
Portugal veteran forward Ronaldo hian kum 40 a kai chho tawh tih hriat maih lohin khawvel hmuhah a thiam ngai a la phochhuak thei zel a; Inrinni zan inkhel lianah pawh chawlhlawk dawn minute 40-naah Ali Majrashi ‘handball’ vanga an penalty hlawhchhuah chu goal hmahruaiah a chantir a, mahse, hun pangngai a tawp hnuah 2-2 a la ni a, penalty shootout hmanga chak zawk zawnnah Al-Ahli chuan 5-3-in Ronaldo pawl Al-Nassr an hneh zui ta a ni.
Kumina Asian Champions League title changtu Al-Ahli hian an siphurh chu first-half hun pekbelhah Franck Kessie-a goal hmangin an sut thei hram a; Kessie hian lei thar Enzo Millot-a ball pek hmangin Al-Nassr keeper Bento ven goal-ah an siphurh sutna goal a chhuihlut.
Second half-ah goal khung belh tumin team pahnih an innawr na hle a; Ronaldo chuan pui taka chhuihin Al-Ahli keeper Edouard Mendy a fiah a; Firas Al-Buraikan pawhin goal ban a petper ve bawk.
Minute 82-ah Marcelo Brozovic chuan Al-Nassr hmahruai nawnna goal tilut bawk mah se minute 89-ah Al-Ahli lamin an siphurh an sut ve leh ta tlat a; he goal hi Riyad Mahrez corner chhuih atanga intan niin, Al-Nassr keeper Bento chuan corner ball chhuak hi a chhut sual a, hmunhima a dahsawn zawh loh avangin Roger Ibanez chuan Al-Ahli siphurh sutna goal a tauhlut.
Shootout hmanga pawhthen an ngai a; Al-Ahli lam atanga penalty pet tura pen chhuak mi pangate’n an thun vek laiin Jeddah khaw club tana Ronaldo spot-kick thun chuan awmzia a nei zo ta lo a, a tum hnihna’na Saudi Super Cup title hawn an tumna a hlawhchham.