Rorel lai VC thlangtling ang u
– ZPM president
Kan khawtlang thleng phak hmasawnna tak tak kan neih theihna atan rorel lai VC ngei thlangtling turin Zoram mipui a ngen tih ZPM president Lalliansawta chuan a sawi.
Lunglei East biala Leite leh Rotlang East a tlawhnaah Lalliansawta chuan, democracy ram kan nih angin India sawrkar chuan khua leh tuite vote thlak theihna tura dikna chanvo min pe a, kan hma lawkah LC/VC inthlan kan hmachhawn dawn a, ZPM party pawhin beiseina sang tak a nei tih a sawi.
“Kan ram siamtha tur hian hruaitu hmasaten theihtawp an lo chhuah tawh a, chutih rualin kan ram hmasawnna a kalmuan em avangin ZPM party a lo piang ta a, ram rorelnaa Pathian ram tundin tumin theihtawp kan chhuah mek a ni. Kan khawtlang thleng phak hmasawnna tak tak kan neih theihnan rorel lai VC ngei thlangtling turin Zoram mipui kan ngen a ni,” a ti.
Lunglei East bialtu MLA, minister Lalrinpuii pawhin ZPM chuan ram rawngbawlnaah huang zauh zel a tum a, kan ram siamtha tur leh hmasawnna tluantling thlen turin Pathianin tun hun atan a ruat a ni tih hria a, ram hmangaihna thinlung putu leh ram leh khawtlang rawngbawlnaa ngaihtuahna sengtu zawng zawng ZPM party-ah haw khawm zel turin an sawm tih a sawi.
MLA-ah sawrkarna an chang tawh a, LC/VC ah sawrkarna an chan leh chuan khawtlang hmasawnna chak zawkin a kal thei dawn a. Ram leh khawtlang hmangaihna thinlung pu a, ngaihtuahna fim tak nen inthlan hmachhawn turin a ngen tih a sawi bawk.
Rorel lai VC thlangtling ang u – ZPM president
