Political party ten ram kaihhruai an tum dan policy tha leh rintlak an chhawpchhuah a ngai a, chumi hmang chuan, ‘eng party policy hi nge kan ram tana tha ber tur’ tih mipuiin an lo buk ve thin.
He system hi ram changkang kan tih ten inthlan an kalpui thin dan tlangpui a ni tawh a. Mipuiin party policy an buk theih chhan chu, policy neituten thlan tlin an nihin an policy an tihhlawhtlin ngei thin vang a ni.
Hei hi a ram pum huap ang chuan India hian a la tlin ve chiah lo a tih theih ang a; chutih laiin Delhi leh Bihar-ah te chuan ram changkangte system hlimthla ang hi kan hmu vuai vuai tawh a tih theih awm e.
Tun tum inthlan kan hmachhawn turah pawh hian, Delhi sawrkara roreltu hmingthatna hmachhuanin Mizoramah pawh ‘AAP party chuan…’ tih thawm chanchintharah hriat tur a awm ve ta zut a nih hi; chu chu rorelna dikin a ken tel chu a ni. Roreltu dikin rorelna dik an kalpuina state chu ‘tlang chunga khua’ ang maia hmuh hmaih theih loha langsar a ni mai thin.
Tunhmaa Mizoram inthlan boruak leh tun hnua inthlan boruak pawh a danglam tawhin politics tui nu tia sawi mai thin, khaw eng pawh zah zo lova ‘last minute’ -a pawisa sem tum theuh theuh tlaivar thak thaka inven ngai thin te, policy ni lova candidate te mimala inbeihna te, bengchheng tinreng nena kawng zawh mup mup leh polling booth bula party office siama aurinna hmanga inaurinsiak angte kha hmuh leh hriattur a awm tawh lo va, kan ziaawm sawt viau; hei hi MPF thawh rah kan ti lo thei lovang.
Tunah chuan a thlangtu mipuite hian harhtharna kan chang chho ve zel a, tunhmaa thawm nei lian, ‘tling tura rin’ vote mai thin khan ‘tling tura duh’ an vote ve ngam ta niin a lang.
Rorelna dik awm tur chuan hruaitu an pawimawh tih a lanna, India ram state thenkhatah example tur kan nei mek a. Roreltu inthlak satliah a awm theih a, roreltu inthlak ruala ram dinhmun a tha zawnga inthlak hlawk ang hi chu state pahnih khat bak sawi tur an la awm lo a ni awm e.
Hruaitu tha pawimawhna leh hruaitu tha thlang theitu mipui pawimawhna hi a intluk a ni.
Rorelna dik
![](https://theaizawlpost.org/wp-content/uploads/tap_logo-min-large.jpg)