Zofate chu rorelna pakhat hnuaiah zalenna famkim nen kan la awm ho dawn tih minister Lalruatkima chuan a sawi.
Rural Development department hnuaia Ngopaa Community Hall sak a hawnnaah RD minister Lalruatkima chuan Manipur Zofa unaute chak lakna dan beh mek a ni a, Mizoram lam atang loin chak a lak theih loh a, Ngopa road-ah lirthei lian a tlan tam phah hle tih a sawi. “Kan unaute dam khawchhuahna a nih phawt chuan kan kawng chu chhe rih ang hmiang, Pathian zarah kan siamtha leh mai ang, tih hi ka ngaihdan a ni,” a ti.
He hnamin buaina hrang hrang kan hmachhawnna karah hian Pathianin mi ensan lo tih sawiin, “Hmasawnna hna a kal mek zel a; nationalism-in mawi takin par a chhuang mek bawk. Kan unaute nena kan inunauna kan lantir dan hi a mawi a. Zofate hi engtik niah emaw chuan rorelna pakhat hnuaiah zalenna famkim nen kan la leng za ang. Chumi hlimthla chu tunah hian a lang mek a ni,” a ti.
Mizoramin harsatna hrang hrang a tawhnaah sawrkar a tlanchhe ngai lo tih minister hian a sawi. “He ram hi Zofaten kan chenna tura Pathian min pek a ni a, humhalh a ngai tih kan hria a. Huaisen takin ram tan he sawrkar hnuaiah hian Zofate kan ding mek a ni,” a ti.
Mizoram RD department chu India ram puma titha ber dawttu a ni pha a, Delhi sawrkar ai pawhin a titha zawk niin RD minister hian a sawi a. Ni za inhlawhna ni zaah ni za kan inhlawh theite hi ministry hmasa lamah a la awm ngai lo tih a sawi.
Ngopa Community Hall sak thar hi Border Area Development Program hunlaia cheng nuai 109.50 senga sak a ni.
Rorelna pakhat hnuaiah zalenin kan la awm ang – Lalruatkima
