High Court-in a hnawl tawh Riverine Reserve Forest Notification 1965 tih nun leh tuma Supreme Court-a khinglettuten thudik lo an thehlut nia sawi a ni a. Mizoram sawrkar chu he notification hi thiah a nih theih nan hma la tura ngen a ni.
Land Owner’s Association Kolasib District (Package 3-8) thuchhuak chuan, High Court-in kum 2021-a Forest Act 1955 tlawhchhana siam RRF Notification chu a nuaibo tawh laiin, tunhnaiah Supreme Court-in tinung leh turin stay order a tichhuak tih a sawi a. Petition thehluttu – Vanramchhuangi, VL Hrima, Romalsawma, Rongura Hrahsel leh Dr Lalbiakmawia Ngente te chu an dem tih sawiin, mipui harsatna siamtu leh ram hmasawnna daltu an nih bakah thudik tawk lo hmangin court-ah hian petition an thehlut niin a sawi.
‘Preliminary notification anga court-a an thehluh hi preliminary notification niloin, final notification zawk a ni. Reserved forest puan a nih dawn hian mipuiah puanzar awm loin final notification tih chhuah tawp a ni a. Section 21 hi final notification puanna tur a ni,’ a ti a. Reserved forest puang tura danin a phutte an zawm lo tih a sawi.
Court chu thudik lo hmanga hmin (misguide) tumah puhin, final notification anga court-a an sawi, 1957 September 16-a Zoram hriattirna chhuah chu final notification niloin, thing kih phal loh chungchanga mipui hriattirna satliah, executive order zawk a ni tih a sawi.
Forest Act 1955 tlawhchhana reserved forest puan a nih hian, danin a phut Section 15 -20 chu pakhatmah an zawm lo nia sawi bawkin, environmental NGO-te petition-ah hian reserved forest hi Forest department enkawl ramngaw chhah tak (dense forest) anga an sawi pawh thu dik lo a ni tih a sawi.
‘1965 kuma reserved forest an puan hma kum engemawzat kaltaah heng hmunah hian khua a lo ding tawh a, chu’ng khua te chu reserved-ah an puan hnan a ni. Hetianga NGO-ten thudik tawk lo (misleading information) hmanga court-a petition an thehlut hi court zah lohna a ni a, an petition hi cancel theih a ni. A thehluttute hian sum tam tak an chawi theih bakah lung in hial tan theihna a ni,’ a ti.
Land Owner’s Association-te sawi dang:
* RRF Notification 1965 hi thiah (de-notify) a nih theih nan sawrkarin hma la rawh se.
* RRF Notification 1965 chungchangah hian Supreme Court-in mipui dinhmun thlir chunga thutlukna dik tak a siam kan beisei.
* RRF chhunga chengte dinhmun (ownership of land) hi sawrkarin tichiang thuai se.
* RRF notification a nun leh tak avangin Forest ram chhunga chengte pawh hnawt chhuak (evict) se, an chenna tur ngaihtuahsak (rehabilitate) rawh se.
* Kan dikna leh chanvo humhalh turin ram neitute hian a tawp thlengin kan bei zel dawn.