Reserved forest atana lui dung hman mek ti tawp a, tlangsang lama reserved forest siam duh thintu Pu Lalduhoma chuan chief minister a nih hnuah luidunga reserved forest siam a duh leh ta si tih MNF Legal Board chairman C Lalramzauva chuan a sawi.
Thawhtanni Mizo Hnam Runa inkhawmah MNF PAC member ni bawk C Lalramzauva chuan, mipui tana dan hlui tawh, ZNP an nih laia Pu Lalduhoma pawhin tih tawp tha a tih, a CM hnu pawha tih tawp tha a la tih zui zel, Riverine Reserved Forest 1965 chu tunhnaiah tinung tura hma lak leh a ni tih a sawi.
“ZNP an nih lai khan Assembly House-ah a member pui Pu K Liantlinga chu Mizoram Assembly 6-naah resolution putluh tirin, RRF area thiata tlang sang lama sawn rawtna a thlentir a; hei hi House pawhin lungrual takin a pass. Hemi hnu, 2019 November 19 khan House-a official resolution pakhat sawihonaah tlang sang lama reserved forest sawn a tul thu leh luipui kam ram thalai hman tangkai theiha siam a tul thu Pu Lalduhoma hian a sawi leh bawk,” a ti.
Hetihlai hian tunah chuan a dinna thlakin, RRF tih nun leh tumna chu Pu Lalduhoma kaihhruai sawrkar hnuaiah Mizoram sawrkar advocate general chuan a thlawp leh ta daih si tih MNF hruaitu hian sawiin, “Kan CM hian eng rilru nge a put tih hi ka zawhna a ni. Kha leh chen thil tha a lo sawi tawh a, thil tha tinreng ti turin an intiam a. Pu Duhoma sawrkarin min hruai dan tur hi a lang ruak tawh a, a ropui lem lo viau dawnin a lang. An sawi loh dan ang hlirin an awm chho ta a ni ber,” a ti.
Sawrkar hmasa hunlaia pass tawh – The Mizoram (Protection of Rivers) Act 2023 chu ZPM sawrkarin nodal department tur pawh a la siam fel loa, dan pawimawh tak hi an la mut tir mai mai tih C Lalramzaua hian a sawi. “Khaw chin inthlak zelah kan luite enkawl a, vemhim a, humhalh a tul tehlul nen, lui 16 zet enkawlna tura sawrkar hmasain dan a lo siam tawh chu ngaihthah a ni mek,” a ti.
RRF thiah duhtu thin khan CM a nih hnu ah duh leh lo – C Lalramzauva
