Rs 3-in sawhthing hralh

Mizoram sorkarin sawhthing a lei a, sorkar lei sa hi mi hrang hrangin an lei chhawng ve leh; Rs 3-a lei te an awm.
Mizoram sorkarin sawhthing a lei khawm hi hnam dang leh Mizote hnenah an hralh chhawng leh a, an hralhna rate hi a inang lo nuai! A lei tlawm ber chuan kg-ah Rs 3-in an lei a ni.
Buffer stock point atanga Rs 3-a lei hi mi pali an awm; Lalremruati’n kg-ah Rs 3-in kg 62,976 a lei a, R Chaudari pawhin Rs zelin kg 6,348 a lei. Sai Kripa Association-in Rs zelin kg 26,350 an lei a, Rakhes Ali-a’n Rs 3 zelin kg 11,679 a lei.
A lei to berin kg-ah Rs 30-in an lei a, Rs 30-a lei hi pahnih an awm; NERAMAC-in kg 424,819 an lei a, IVC Agrovet-in kg 98,189.91 an lei.
Sawhthing man hi a inang lo nuai a, Rs 28-a lei hi a lei to ber dawttu an ni ang. Bor Axom-in Rs 28 zelin kg 10,068.45 an lei. Kg-a Rs 27-a lei an awm a, Rs 25-a lei an awm bawk. Rs 25 leh Rs 30 inkara lei hi tlem azawng an ni a, anni hi a lei to pawl an ni.
A lei tlawm berin Rs 3-in an lei a, a chung chiah chu Rs 10 niin, Rs 10-a lei hi panga an awm. A chung chiah chu Rs 12 a ni a, Rs 12-a lei hi pakhat a awm. Kg-a Rs 14-a lei an awm a, Rs 16-a lei an awm bawk.
Heng hi buffer stock point atanga hralhna rate a ni a, mi dang, secondary collection centre atanga lei an awm bawk. Secondary collection centre-a an leina man hi hriat theih a ni rih lo a, kar hmasaa neih Assembly session-ah pawh khan a changtu minister-in secondary collection centre-a leite leh an lei zat te hriat a nih rih loh thu a sawi.