MizoramaRajya Sabha MP thlan turah nomination thehluh hun a tawp a, political party pahnihin official candidate an siam. ZPM party chuan an official candidate thlawp turin Legislature Party dang an ngen.ZMP party-in an candidate tur an tihchian hnu ah MNF party chuan Thawhtanni khan an official candidate tur an puang a. Zothansangi Hmar d/o Rualkhuma Hmar, College Veng Aizawl a ni. Returning officer, Assembly commissioner Zothansanga Ralte hnenah nomination a file nghal a, MNF MLA pali-in signature pe in an thlawp a ni.
MNF Rajya Sabha candidate puangtu, MNF senior vice president Dr R Lalthangliana chuan, MNF-ah kum naupang zawk leh thalaite tan hmun zau tak a awm a, RS MP candidate-a hmeichhia ruat hmasa ber party an ni a, hmeichhiate hian MNF-ah hmun pawimawh tak an luah thei a ni tih a lantir a, duhsakna sang ber an hlan tih a sawi a ni.
MNF RS MP candidate Zothansangi Hmar chuan, MNF-in ram tana hma a lo lak tawh leh hmachhawp chhunzawm ve theihna kawng zawh tura MP (RS) candidate atan ruat a ni chu phu lo a intih rualin lawmawm a tih thu a sawi a. MNF candidate mai ni lo, Mizo hmeichhiate aiawha ding leh Mizo mipui aiawha ding a ni tih a sawi. Ukil a nihna angin dan chu miretheite tanpuina atan, dikna humhimna atan hman theih a ni tih a hria a, hemi kawngah hian theihtawp chhuah a inhuam tih a sawi a ni.
Thawhtanni vek khan candidate pahnih hian returning officer Zothansanga Ralte hnenah rinawm leh thuawih taka India ram danpui zawm tur leh danpuiin India ram thuneihna a pek leh inpumkhatna vawnghim turin thu an tiam a ni.
Election Commission of India thuchhuah danin, nomination file hi vawiin – June 9 hian endik a ni ang a, June 11 thleng inhnuhdawhna hun hawn a ni. June 18-ah MLA-ten an thlang dawn a, zing dar 9 atanga tlai dar 4 thleng vote thlak hun hawn a ni anga, hemi ni vek tlai dar 5-ah vote chhiar nghal a ni ang.
Tuna Mizoram-a MLA 40 awmah ZPM-in MLA 27 a nei a, MNF 10, BJP 2 leh INC 1 a ni. Rajya Sabha MP thlanah hian Mizoram MLA pakhat vote hlutna hi 100 zel a ni. Tling turin vote 2100 (MLA 21) mamawh a ni.
Thawhtanni khan ZPM Legislature Party secretary TBC Lalvenchhunga chuan Congress, BJP leh MNF Legislature Party secretary theuh ‘address’ in tun RS MP inthlan turah an party official candidate chu Mizoram leh a chhunga cheng mipui tana kawng hrang hranga a thatna tur tarlangin, vote pui theuh tura ngenna lehkha an hlan a ni.
RS MP candidate pahnih awm dawn ZPM-in thlawp turin party dang ngen
