Rashtriya Swayamsevak Sangh (RSS) media wing Vishwa Samvad Kendra (VSK) te chuan ‘Conversion and Reservation’ tia ni hnih awh conclave an neih hnuah lungrual takin sakhaw danga inlette hnenah reservation pek zui loh ni se tiin thutlukna an siam.
Sawihona neihnaah Telangana high court judge hlui Justice B. Shiva Shankar Rao (Retired) chuan sakhaw danga inleh chu ‘mahni sakhaw vawn lai kalsan hmaka sakhaw dang vawn’ tiin a sawi a. Sakhaw danga inleh tih chuan i rinna i bansak hmak tihna ni a. I rinna leh sakhaw vawn i thlauthlak tawh chuan, chu i sakhua behchhana pek reservation atanga hlawkna awm chu eng vangin nge i dawn zui zel theih ang? tiin zawhna a siam a ni.
He conclave neihna Gautam Buddha University, Greater Noida a neihah hian retired judge pasarih, university hrang hranga Chancellor leh Vice-Chancellor pasarih, professor leh lecturers 30, eminent lawyer pariat leh pawl hrang hrang aiawha thawk 30 chuang, heng zingah hian VHP, RSS leh an kaihhnawiha inziak lutte an tel a ni tiin organiser te chuan an sawi.
Padma Shri Milind Kamble, chairman of Dalit Indian Chamber of Commerce and Industry (DICCI) pawhi thusawina neiin conclave neihnaah hian reservation siam leh pek a nihna chhan chu aiawh tlem zawk tena aiawh an neih theih nana siam a nih thu a sawi a.
“Mahse, sakhua danga inlette chuan reservation phu em em te an chhuhsak tihna a ni a. Chu chu an tum a ni a, vawiin thlengin a la ni reng,” tiin a sawi a, mi thenkhatte chuan sakhaw danga inletin politics lama thuneihna chan an tum phah tiin a sawi a.
“Reservation min chhuhsak lo hian an duh a nih chuan Minorities Commission hnenah reservation dil mai se,” tiin a sawi.
Surendra Jain, central joint general secretary of Vishwa Hindu Parishad (VHP) chuan Dalits sakhaw danga inlette hian Schedulef Caste te welfare an ngaihtuah lo va, an tum ber chu an sakhaw vawn theh darha a vuantu tihpun a ni tiin a sawi.
“Scheduled Caste ngaihtuah se la chuan Scheduled Caste an nih avanga reservation an neih te chu minority dang tena hlawkna an chan theih nan pe tur awm tak an ni,” tiin a sawi a, sakhaw danga inlette hnena reservation pek tihtawp chu ram pum huapa sawiho zui zel ni se a ti bawk a.
Jain chuan VHP te chuan ‘pan-India conclave’ buatsaihin educationists, jurists leh sociologists te chu he issue hi ngaihtuah ho tura chhawpchhuaksak a tum thu a sawi bawk.
Dalit Christian leh Muslim te hnenah SC status chu pek zel tur a ni em tia inhnialna reitak awm tihchianna turin Union Government chuan October 2022 khan comission Chief Justice of India hlui K.G. Balakrishna kaihhruai dinin zirchiang turin a ti a.
RSS media wing te chuan VHP te nena tangkawpin Commission hnenah hian conclave a thutlukna an siam te chu thehluh an tum thu an sawi zui bawk a.
Arun Halder, Vice-Chairman of the National Commission for Scheduled Castes (NCSC) pawhin conclave a thusawina a neihah society a dinhmun hniam zawk te chawikan nana reservation chu siam a ni tiin a sawi a.
“Casted-based reservation hmangin society a hnufum zawk te chu hma lam pana an awm theih beisei leh tanpuina tura siam a ni a, hei vang hian reservation hi kalpui a ni. Mi thenkhat te duham leh nawrna avanga sakhaw danga inlet tawh tena reservation benefits an neih zui zel hi chu a dik lo a ni,” tiin a sawi.
He conclave-a tel tho Prof. S.C. Sanjeev Rayppa pawhin sakhaw danga inlette hnenah reservation benefit pek zui zel a nih chuan sakhaw danga inlet an pung zual zel ang, tiin a sawi bawk.
RSS ten dan chepna kalpui zel
![](https://theaizawlpost.org/wp-content/uploads/tap_logo-min-large.jpg)