RTI-a mipui rahbeh tumna kan
chhuizui ang – Congress Thalai
Sawrkar kal mek hnuaiah Right to Information dan hmanga mipui zawhna chu chief minister leh minister dangten an en thin avangin a huna chhanna pek hman a nih loh thin bakah he dan hnuaia zawhna chhangtu tur sawrkar officer ruatte leh mipui rahbehna a thleng mek tih Congress Thalai chuan sawiin, an chhuizui tur thu an sawi.
Congress Thalai Hqrs. thuchhuak chuan, RTI Act hman hnu ah mipuiin awlsam takin an dikna chanvo leh sawrkar hmalakna an hre zung zung thei a, sawrkar khalh ngil kawngah mipui an thawhlawk hle a; Right to Information a nih angin classified/ sensitive case a nih loh chuan a chhangtu tur SPIO-ten ni 30 chhungin an chhang thin tur a ni tih a sawi.
He mipui dikna chanvo hi ZPM sawrkarin a rapbet mek nia sawiin, SPIO-ten uluk taka RTI chhanna an buatsaih chu chief minister leh minister-ten an lambun thin niin a puh.
‘ Sawrkarin a ruat SPIO hnathawh chu ZPM party-in an duhdan zawnga her rem tumin an kalpui a, hei hi mipui dikna zahlohna leh palzutna a ni,’ a ti.
2024 October 16-a chhuak The Aizawl Post chanchinbu ah RTI hmanga zawhna September 25-a chhan tawh tur chu chief minister-in hetihlai hian ala kawl mek a; department-in RTI chhanna a lam theih tih an sawi pawh a lam tura kal ten minister-in a endik leh dawn avanga lam leh theih loh bakah RTI chhanna minister thenkhatin an kawl avangin a hun takah RTI chhanna a zawttuten an dawng thei lo tih tarlan a ni tih a sawi.
‘Hei hi ram mipui tan a him lo takzet a. ZPM sawrkarin thil dik lo an tih thupnaah Congress Thalai chuan a ngai a, hetianga mipui dikna chanvo rahbehna hi chhui turin hma kan la dawn a ni,’ a ti.
RTI-a mipui rahbeh tumna kan chhuizui ang – Congress Thalai
