Ruah an buaipui!
California lamah kangmei avanga an buai nuai nuai laiin Australian Open khelhna hmun Melbourne khawpui erawh ruahpui vanawnin nimin atang khan a chhu nek mai a, season-opening Grand Slam tournament tan taka match engemawzat chu ruahman lawk anga khelh theih a ni lo hial a, fans lam pawh nihliap leh raincoat nen an phe dawr dawr!
Ruah bakah hian kawl a phe un un a, khawpui ri dur dur karah thli a thaw vuk vuk bawk a; chungkhuh neia an siam stadium pathum – Rod Laver Arena, Margaret Court Arena leh John Cain Arena pawn lama court hrang hrangte chu ruah avang hian a ruak hiai huai a, a hun taka inkhel tan theih a nih loh avangin darkar khat chuang laite’n match khelh hun sawnhlat a nih piahlamah singles match panga zet chu hun dang atan thulh a ni hial!
Khaw chhia hian nimina singles match 32 khelh tura ruahman a tibuai a, tualchhung zirlai tlangval pakhat Alex an tih chuan inkhel en turin thuthmun rem ngial mah se ticket manah 60 bucks an chawi thlawn a, en tur engmah a awm lo niin amah kawmtu media mi a hrilh.
Tarlan tak angin, Chinese number one Zheng leh Romanian qualifier Todoni-te chuan Rod Laver Arena chungkhuh hnuaiah hul phiangin bul an tan thei ta bik a ni.
Ruah an buaipui!
