Vawiin – May 29 atang hian ni hnih thum chhung vel ruah leh thli thawk na thei a nih avangin sawrkar chuan theih ang anga lo inralring lawk turin mipui a chah. Sawrkar laipui Ministry of Earth Sciences-a India Meteorological Department (IMD) chuan hmarchhak hmun thenkhat, Mizoram telin thli leh ruah thawk nasa thei niin a sawi a. May 29 atanga intan tura ngaih niin, June 3 thleng vel pawh awh thei a ni tih a sawi. Vawiin – Ningani bik hi thawk nasa zual deuh tura rin a ni.
Hemi ang hian Mizoram Disaster Management & Rehabilitation department bakah District Disaster Management Authority (DDMA) tin chuan inralring turin mipui hriattirna an tichhuak a. Aizawl Municipal Corporation pawhin hemi chhung hian an huamchhungah lei laih thar a khap.
Regulation 10 of the AMC (Site development & Slope Modification Regulations 2017) in thuneihna a pek angin Aizawl Municipal commissioner chuan May 28 atanga June 2 thleng ruahpui thleng thei reng a nih avangin, leimin leh chhiatna awm palh thei pumpelhna atan an huamchhungah lei laih khap a ni tih a sawi.
DDMA Aizawl pawhin Aizawl district-a Local/ Village Level Disaster Committee chu mahni veng/ khua theuhah a tul anga hma la turin a hriattir a. Ruah leh thli a thawh nat avanga chhiatna pumpelh thei tura mahni chenna, hnathawhna, tuiluankawr, electric current kaihhnawih laka himna ngaipawimawh turin a chah a ni.
Thudawn danin, khaw chin ngaichang chungin school chawlh puan chungchang chu ngaihtuah tur a ni a. Nilainia khaw dinhmun thlir chuan school chawlh puan nghal rum rum tumna a awm rih lo a ni.
Ruah nasa tak sur theiah sawrkarin inralrin dar vua
