Mi thahnemngaite’n Tlawng luia luang lut lui kawr an thian fai a, mahse Nilai zana ruah surah khan an tihfai tawhah bawlhhlawh a inchhek leh hnur mai!
Nilai zanah ruah tam tham tak a sur a, “Save the Riparian” te’n an lo tihfai tawh, Aizawl lui kawr a tawp tha leh a, a tukah a bul atangin an thawk tha leh.
Hnatlanga telte sawi danin, bottle ruak a tam a, thar ver vur tak tak te a ni hlawm. Naute diaper hman hlui a tam leh hle bawk. Plastic lam a tam a, in chhung bungraw hman hlui a tam.
“Bawlhhlawh a rawn inchhek tha leh a, a bul atangin kan tan tha leh tluk a ni,” frontline team leader Roma Hmar chuan a ti a, “Mahse a nghet hman lo a, a hmaa mi anga beih fe ngai a ni lo a, a ziaawm,” a ti bawk.
Bawlhhlawh hi Aizawl khawpui atanga lut khawm a nih thu a sawi a, bawlhhlawhah hian ruah sur laia lui kawra paih leh tuihawkina a lenkhawmte hriat hran theih a nih thu sawiin, “Ruah sur laia lui kawra paih a tam a, ruah sur veleh remchang chuhin lui kawrah bawlhhlawh kan paih thin tih a chiang. Tuihawkin a lenkhawm pawh a tam tho a, hei pawh a paihna tur ni lova paih tho a ni,” a ti.
“Kan tan tlan a ngai a, dan lekkawh a ngaihzia a lang. Tuna kan dinhmunah chuan, fai kuar mah se rei lo teah a bawlhhlawh leh mai dawn tih a lang reng a, chuvangin mipui leh thuneitute kan tan a ngai tak zet a, kan tui tlan Tlawng lui a thianghlim theih nan kan vaia kan tan a ngai,” a ti bawk.
Ruah sur hnua bawlhhlawh awm thar an hmuhte chu han en mai pawhin a la thar tih hriat theih a nih thu a sawi a, tui bottle te pawh hmanna la rei lo tih a lan thu a sawi.
Ningani-ah hian Govt Johnson College zirlai thenkhatin an hnatlanpui a, bawlhhlawh a la nghet hman lo bawk nen, a hma ai chuan an hna pawh a sawt tih thu dawn a ni.
Save the Riparian te hian Aizawl khawpui tui tlan Tlawng lui then fai an tum a, Tlawng fintu lui leh Aizawl atanga Tlawnga luang lut lui kawr atangin March ni 26 khan hna hi an tan. Ni 20 chhunga Tlawng lui thlen hman an tum a, mahse lui kawr a lo tawp em avangin thui an thleng thei lo. Tunah pawh Aizawl chhungah an la awm a, chutah Nilai zan ruah surah khan an then fai tawhte a tawp tha leh a, bul an tan tha leh titih ta a ni.
A hmain an tum an lo thlak tawh a, Tlawng thlen hmain Aizawl veng hrang hranga lui kawr, Tlawnga luang lut leh Chite luia luang lut lui kawr tihfai phawt ni se tiin an lo rel tawh.
Ruah surah lui kawr then fai sa awp tha leh
