Ruahsur tam lutuk chuan Australia a north Queensland a tibuai hle a, tuilian nasa tak siamin helai bial velin tuilian a tawn tawha la nasa ber a ni bawk.
Mi sang tam tak hmun hima thiarin an awm a, tam tak tangkhang an awm bawk a.
Tropical cyclone-in a ken tel extreme weather chuan kumkhata ruahtui dawn tur ang zah vel ruahtui a thlawr a ni.
Cairns airport chu tuilian hian chimin thlawhnate pawh a chim a, khawpui laili laiah awle te pawh hmuh niin mi tam tak te chuan lawng hmangin an chenna an chhuahsan a. Tun thlengin nunna chan an awm erawh hriat a la ni lo.
Ruashur nasa hian darkar 24 a la awh tura ngaih a ni a, mi za tel chhanchhuaha awm tawhin chenna In tam tak chu tuilianin a chim a, power a awm lo va, kawngpui danchahin a awm a, tui thianghlim in tur a vang tawh bawk.
Cairns khawpui chuan ruahsur tirh atangin 2m ruahtui a dawng der tawh a. Queensland Premier Steven Miles chuan khuarel chiatna an tawn mek chu ‘ka hriat theih china la turu ber’ tiin a sawi a.
“Cairns tualchhung mite ka biaknaah pawh tun ang renga nasa an la tawn ngai loh thu min hrilh a ni” tiin a sawi bawk.
Tuna an buaipui ber chu tuilian chim chin sang zel karah an chenna in chhunga tangkhangte chhanchhuah a nih thu sawiin mi pakua lai chu emergency crew tena an chhanchhuah mai theih loh avangin hospital in chungah zan an hmang tiin a sawi bawk.
Wujal Wujal khua a cheng zawng zawng chu hmun hima thiar ngai vek an ni tiin a sawi bawk a. “Tuna kan ngaihtuah ngai chu tui thianghlim in tur a ni a, power leh telecomuncation a pawimawh bawk a, kawngpui tam tak danchahin a awm a, vansang lam atanga puihna kan hmu thei bawk si lo,” tiin a sawi bawk.
Khawchin thlir mite chuan darkar 24 chhung chu ruahsur a la nasa dawn an ti a, hei vang hian hmun hniam deuha awm te tan fimkhur a ngaihthu an sawi bawk a. Ruahsur chu Thawhlehni atangin zia awm tan deuh tura ngaih niin mahse a sur chhunzawm reng rih dawn an ti bawk.
Lui tam tak te chuan an kuang an chim pel tura ngaih niin kum 1977 a tuilian turu tak thlenga record awm te chu khum a nih gnei rin a ni a. Daintree River chuan a hmaa record awmsa chu 2m-in a khum der tawh bawk.
State officials te chuan khuarel chhiatna avanga hloh hlut zawng chu A$1 billion a pel tawh tiin an sawi bawk. Eastern Australia chuan tun hnai kumah tuilian a tawk fo a, El Nino weather event an tawng mek bawk a. EL Nino thlen lai chuan extreme event heng ram ngaw kang leh cyclone te a turu zual bik zel a ni.
Australia hian tun hnaiah chhiatna a tawk nasa hle a, khawkheng turu tak te, phul hmun kang nasa tak te, tuilian nasa tak te bakah Great Barrier Reef bleaching event tum ruk a tawng tawh bawk.
Ruahsur tamin Australia hmar lam tibuai
