Statistical Handbook 2022-ah kum 20 chhunga Mizorama ruahtui tlak dan record tarlan a ni a. Chutah chuan, tun hnai kum nga chhung kaltaa ruahtui tlak dan chuan, a hma kum 15 kalta chhunga ruahtui tlak dan a pha lo nasa ta hle tih a lang a. Tunhmaa kum khat chhunga ruahtui tlain millimetre sanghnih chuang a kai vek laia, tun hnai kum nga chhunga ruahtui tla zatin millimetre sanghnih a pha lo ta vek mai hi thlir liam mai chi niin a lang lo.
‘Ruahtui tlak that leh tlak that lohah mihringten tih theih kan nei lo; khuarel thil a ni a, a tihngaihna tak a awm lo’ tiin ngaihdan kan siam a ni maithei. Khuarel thilah chuan kan thu lo hle a, mahse, mihringte khawsak phung avanga khuarel thil hi lo danglam thin a nihzia chu mitin kan hmu mek si a nih hi. Hetiang hunah hian, thlir liam mai lova, engtia hmachhawn nge tha ang tia kan ngaihtuah a pawimawh hle a ni.
Mihring khawsak phung (lifestyle) avang hian mihring taksa ngei pawh hi a danglam thin a, chutiang chiah chuan mihring lifestyle (eizawnna) avang bawk hian kan chenna leh a chhehvel (environment) pawh hi a danglam thin.
Thingtlang lo neihna atana ramngaw zau tak tak kum tin kan la vat thlu reng mai te, hmasawnna ruhrel hrang hrang avanga ramngaw kan thiat duai duai reng mai te hi ruahtui insiamna tur tihchhiatna a ni a. Ruah a sur chang pawha leihnuaia tui thuhruk hna thawktu ramngaw a tlem zel avangin lui tui te a lo kang mek a, ruahtui insiam tur a kiam phah zel bawk a, tun hun hi kan thleng ta a ni ber a. Kan lui tui a kang zel nachhan pawh hi lei chhunga ruahtui lo dawng khawla tuihna insiam tur a tlem tak zel vang a ni.
Tihtur kan neih zingah, ‘tih loh’ hi a tel a; chu chu ramngaw ‘thiah loh’ hi a ni mai. Thlalerah ruah a sur ve ngai lo, a chhan chu ruah siamtu ramngaw a awm ve loh vang a ni. Kan khawsak phung hi kan thlak loh chuan thlaler dinhmun hi kan hnaih zel tihna a ni ber awm e.
Ruahtui tlak dan tlahniam hi
