Rualbanlote hamthatna ngaihtuah
State Advisory Board on Disability chu Social Welfare, Women & Child Development minister Lalrinpuii kaihhruaiin Thawhlehni khan an thukhawm.
Minister chuan State Advisory Board member-te chu Mizoram pum aiawha rualbanlote ngaihtuahtu an ni tih hrereng a, an tha leh zung leh rilru chu pianphung leh rilru lama chanhaite tana seng turin a fuih a. Rualbanlohna chi hrang hrang a pung zel tih sawiin, an hamthatna humhalh leh hmasawnna tur ngaihtuah zel chu chief minister nena an thil ngaih pawimawh zinga lian tak a ni tih a sawi.
An thu ngaituah leh hmalakna tur sawiho zingah – Mizorama Special School-te tihchangtlun, Govt. Primary School-II Durtlang chu Special School atana ruat; ‘B.Ed in Special Education’ a awm theihnana hma lak; rualbanlote tana tanpuina chi hrang hrang ennawn; rualbanlo zirlaite tan ‘reader and scribe allowance’ pek dan tur; rualbanlote tan bika healthcare scheme duan chungchang; rualbanlo enkawl ngai bikte tana hamthatna duan; government e-Office platform chu rualbanlote tana awlsam zawka hman theiha siam; Women & Child Development department-in rualbanlo hnuchham naupang a enkawl mekte tana hamthatna tur siam tih te a ni.
State Advisory Board on Disability hi rualbanlote tana board din a ni a, an hmakhua leh hamthatna humhalh kawnga thurawn petu, consultative leh advisory board a ni. He Board-ah hian sawrkar department hrang hrang hotute bakah rualbanlo aiawh pawlte member an ni.
Rualbanlote hamthatna ngaihtuah
