Ruang finfiah mek zel, CM hlui ruang la hre lo

Ruang finfiah mek zel, CM hlui ruang la hre lo
Ahmedabada-a thlawhna tlaa thi tel ve, Gujarat chief minister hlui, Vijay Rupani-a ruang ber an la hre thei lo va, hetih lai hian Pathianni chawhma thleng khan ruang dang 12 erawh chu an chhungte hnenah an hlan tawh.
Ningania thlawhna tlaa thite hi an kan nasat avangin hriat mai theih an ni lo va, DNA hmanga finfiah hna thawh mek zel a ni tih Civil Hospital, Ahmedabad-a Additional Medical Superintendent Dr. Rajnish Patel-a chuan a sawi.
Rupani-a hi AI 171-a chuang thi mi 241 zingah khan a tel a. Boeing Dreamliner 787-8 thlawhna kha London-a Gatwick Airport pan niin a thlawh chhuah hnu lawkah a tla.
Thlawhnaah khan passenger 230, crew member 10 leh a khalhtu mi pahnih, an vaiin mi 242 an chuang.
“Chief minister hlui, Rupani-a ruang hriat tuma la beih mek zel a ni a, DNA a la inmil thei lo va, hriat a nih veleh puan a ni ang,” tiin Patel-a chuan thuthar lakhawmtute a hrilh.
Patel-a chuan DNA inmil 31 a awm tawh a, heng zinga ruang 12 chu an chhungte theuh hnenah an hlan tawh tih a sawi a. “A dang pawh kan finfiah ang a, an chhungte hnenah kan hlan zel ang,” a ti.
Tute nge an nih hriat tawh ruangte hi Udaipur, Vadodara, Kheda, Mehsana, Ahmedabad leh Botad district-a mite an ni hlawm tih Patel-a chuan a sawi bawk.
Ruangte finfiah leh finfiah tawh an chhungte hnena hlan hna hi doctor, assistant leh lirthei khalhtu 600 chuangin an buaipui mek a. Damdawi in tualah an chhungte tam takin an ngaichang thup bawk.
Pathianni tukah khan Ahmedabad damdawi ina thuneitute chuan thlawhna tlakna hmun, BJ Medical College-a zirlai leh an chhungte hliam tuar mi pali dang an thih belh leh tih an sawi a. Hengte nen hian he chhiatna thlenga thi hi mi 250 an tling tawh.
BJ Medical College-a FAIMA vice president, Junior Doctors Association president ni bawk, Dhaval Gameti chuan a hmain zirlai leh an chhungte pali an thi tawh tih a sawi a. Damdawi ina zirlai 20 dah zinga 11 chu an chhuak leh tawh a, pariat pakua vel an la awm niin a sawi.