Ruatpuii’n thuk zawka luh chilh a tum
Tunlai zaithiam lar Ruatpuii fans te tana thu lawmawm – thuk zawka rimawi luh chilh a tum a, chumi atan chuan a inbuatsaih mek.
“Zai lamah nasa zawka inhman ka tum a, kumin chu rimawi hi thuk zawka luh chilh ka tum,” a ti.
Thuk zawka rimawi luh chilh a tum dan chu, ama puala hla a tam thei ang ber neih a ni. Ama pual liau liauva hla neih a tum a, a tum dan chu, ama phuah a sa ang tih te, mi phuah pawh ni se ama hla tur a ngaihtuah ang tih te a ni.
“A then chu ka phuah ang a, a then chu a phuahtute hnen atangin kan lei ang a. Chutiang chuan mahni puala hla neih ka tum,” a ti.
“A tam thei ang ber kan zai turah ka ngai a, zaina tur ka nei a nih chuan zai zel ka tum ang a. Chu bakah chuan music video a theih anga tam siam ka tum bawk ang,” a ti bawk.
Zaithiam lar, thalaite duh hlawh tak mai Ruatpuii hian hla a phuah thei a, pahnih chu a zo fel tawh. A thu a zo a, a thluk pawh a zo. A dang, la zawh loh a nei nual a, chung chu chhunzawm pawh a buaithlak thu sawiin, “A thunawn tur chauh ka ziah tawh a awm a, chang khat chauh ka neih te a awm a, ka chhunzawm theih hlauh chuan hla thar ka nei tihna a ni mai ang a,” a ti.
Hla pahnih a phuah tawhte hi love song ve ve a nih thu a sawi a, mi thil tawn atanga a phuah a nih thu a sawi bawk. A pahnihah hian a thu aiin a thluk a nei hmasa ve ve.
Hla phuah hi thiam a inti lo a, harsat a intih bakah, a tidik lo ang tih hlauhna te a neih avangin ‘confi’ har a tih thu te a sawi a, mahse a thiam ang anga phuah ve a duh a, insit tak chungin a ti ve tih a sawi.
Ruatpuii hian BA a zo tawh a, college a kal laiin Zoram zaithiam lar a ni tawh. Zaithiam lar ni chungin PUC-ah BA(History) a zir a, tha takin a pass a ni.
College a kal lai khan amah zirna leh zai a insu buai lo tih a sawi a, kar khatah zan li te, zan nga te programme nei chungin class a kal a, lehkha a zir zel thei.
“Kei chu, ka buai poh leh ka rilru a chakin ka hria. Hun awl ka neih khan zir har ka ti zawkin ka hria,” a ti.
Chutih rual chuan zai lama inhmang chunga lehkhazir chu hautak a tih ve thin thu a sawi a, “Theihtawp chhuah a ngai. Zai leh zirna hi keimahah chuan a kal kawp thei ka ti a, mahse inthlahdah lova tan chu a ngai,” a ti.
BA a pass thleng khan zai aiin zirna a ngai pawimawh zawk tih a sawi a, amah a inhriat dan pawh zaimi tih aiin zirlai tih a nih thin thu a sawi.
Zirna a ngaihsan thu a sawi a, lehkhathiam nih a duh thu te, zir rau rau chuan a tha thei ang bera pass a duh thin thu te a sawi. Amaherawhchu, kuminah bik chuan zai hi ngaih pawimawh a tum a, heti lam hi thuk zawka luh chilh a tum thu a sawi.
“Zirna hi zai aiin ka ngai pawimawh char char a, ka dah hmasa char char a. Kumin chu zai hi a hma aia ngaih pawimawh ka tum a, thuk zawka luh chilh ka tum a ni,” Ruatpuii chuan a ti.
Ruatpuii’n thuk zawka rimawi luh chilh a tum
