Rubiales chunga hremna – kum thum phuar

Rubiales chunga hremna – kum thum phuar
Kumin Women’s World Cup final-a Spain laka England an tlawm tum lawmman sem laia Spain forward Jenni Hermoso hmuia fawptu Spanish football federation pre-sident hlui Luis Rubiales chu kum thum chhung football kaihhnawih hrim hrima inrawlh thei lo turin Fifa-in a hrem.
A tirah Rubiales hian tihsual a neih loh thu leh player nena inhriatthiam-tawnnaa kha thil kha ti a nih thu sawi chungin mi beina tuartu mai a nih thu a sawi a, Spanish foot-ball federation president a nihna atang pawha ban a tum loh thu sawiin, a nu lah chuan a fapa thlavang hauhin biak in chhungah chaw a lo nghei vei rawl nen!
Thiamthu sawi ngial mah se a khawsak dan kha pawmzam theih a ni lo a, Spain forward pawh chuan a remtihna tel loa fawh tuartu a nih thu sawi chungin court lamah thubuai a thehlut zui ta hial a; an zimtawt ngat ngat hnuah Spanish football federation president a nihna atangin a bang hram a, September thla vek khan Uefa executive committee-a vice-president a nihna pawh a chawlhsan zui ta zel a ni.
Tunkar Thawhtanni khan Fifa chuan Rubiales laka hremna hi tarchhuakin, an pawl dan (disciplinary code) article 13-na a bawhchhiat avangin kum thum chhung hnawhchhuah a nih thu an tarlang.
Fifa disciplinary code Article 13-na hian a sawi chu nungchang mawi lo leh fair play niphung bawhchhiate hremna a ni.
Kum 46 mi Rubiales khan final khelh zawh lawmman sem laiin a kiang hnaia sports mi challangte bakah lal chhungkaw member thenkhat telin mi zahawmpui pui ngir khup karah a kap a tuai vut vut lai thlalak hmuh tur a awm a, Hermoso-i lawmman dawng zo chu lo kuah chawtin a hmuiah tak mai a fawp dir ngur ngur a; demna a nasat chhoh hnuah dawt muhlum nena thiamthu sawiin, a fawh nu nena inhriatthiamnaa kha thil kha ti ve mai chauh a nih thu a sawi.
Kha thil thleng khan Sydney khawpuia Spain champion boruak pawh a hliah zo ta vek a, champion lawm boruak pawh a lian zui thei ta lo!
Thla hmasa mai khan hursualna kawnga puhna a dawn chungchangah Rubiales laka criminal complaint lut chu Madrid khuaa national court-ah ngaihtuah niin, Rubiales chuan rilru hrisel lo pu zawnga kha thil kha ti a nih loh thu sawi mah se Hermoso chu metre 200 aia hnaia hnaih hlek lo turin court-in thupek a chhuahkhum!
Rubiales-a khawsak dan khan nghawng a nei thui khawp mai a, World Cup-winning squad-a member zawng zawng tih theih deuh thaw chuan football federation chhunga thil inthlakthleng ngiatun national team an boycott phah hial a; World Cup-a Spain champion-puitu manager Jorge Vilda pawh September thla khan a hna atangin an ban phah a, Rubiales-a criminal case-ah an chhui tel ve nghe nghe!
Kiss thubuai avanga lar chho hat Hermoso chuan tun October thlatir lam khan national team zawm leh tawhin, minute 89-ah Italy an hnehna goal pawimawh a thun nghe nghe.