Mizoram Excise & Narcotics minister chuan tunhnai khan ruihhlo do kawnga tan lakpuiah mipui a sawm a; ruihhlo a hluar tawh em avangin a dotu lam pawh kan tam a ngai, a ti. Ruihhlo Do Core Committee-in nasa zawka ruihhlo do kawnga hma a lak theih nan sawrkarin mamawha hman tur cheng vaibelchhe 3 a pe, MEN minister hian a ti bawk a; naktuk hian ruihhlo do beihpui thlak khuhhawnna pawh neih a ni dawn nghe nghe a ni.
Ruihhlovin Mizoram a luhchilh thuk tawhzia chu tlang hriat a ni a, chanchintharah ni tin deuhthaw ‘ruihhlo man a ni’ tih hriattur a awm reng a, ‘kumtling lo zingah ruihhlo tih ching an pung’ tih pawh hriattur a awm chamchi ta bawk.
Kum khat chhunga mithhi awm zat han en hian, a tam zawk chu thalai an ni a, ruihhlo tih ching an tam hle bawk. Kum tling lo atanga ruihhlo tih ching an pung chho zel a nih phei chuan, tun atanga kum sawmnga velah chuan ngaihtuahawm tak kan ni dawn tih a lang reng mai. Ruihhlo do beihpui thlak hi a pawimawh takzet tawh tih a lang.
Ruihhlo do han tih hian, ruihhlo man tur phek zawn suau suau (supply reduction) lam ringawt a kawk ber lo a. Ruihhlo lo lut tur lo dan a, a lo lut tawh pawh man chhuah a, supply tihtlem kawnga hmalak hi a pawimawh em em rualin, ruihhlo laka fihlim tura naupang leh thalaite awareness kan pek that a, kan venhim thiam a, ruihhlo hmang lo tura training kan pek that (demand reduction) hi a pawimawh hle. Supply a tam chhan hi chu a duhtu an tam thin vang a ni tlangpui a, ruihhlo ti duh an tlem na na na chuan ruihhlo supply lam hi a tam reng dawn lo.
Chuvangin, ruihhlo dona sawt ber chu ruihhlo ti duhtu tihtlem hi a ni. Hemi chungchangah hian survey leh zirchianna behchhana hma kan lak thiam a finthlak ang a. Chumi hna thawk tur chuan mipuite hi kan tanrual thiam a, chhungkua, khawtlang, pawl leh kohhranah, kan phek buai suau suau hi a hun tawh takzet a, chu chu tun kan ram dinmun hian a phut tlat tawh. |anrual hi chakna a ni, tih hi hetih hun atana hman tangkai tur hi niawm tak a ni.
Ruihhlo do beihpui
![](https://theaizawlpost.org/wp-content/uploads/tap_logo-min-large.jpg)