Ruihhlo do beihpui thlakna
atan ramri hrul khua tlawh
Na zawka ruihhlo do beihpui thlak tuma sawrkar a inruahman meknaah Mizoram Police hotute leh Central YMA hruaitute chuan Thawhtanni atang khan Myanmar nena inrina lama Mizoram khaw hrang hrang an tlawh tan.
Sawrkarin ruihhlo do beihpui (special drive on drugs) a thlak turah Myanmar leh India inrina Tiau lui atanga Mizorama ruihhlo luhna kaikhan awmna khua zawng zawng fang chhuakin khawtlang hruaitute an kawm dawn a. Mizoram Police IGP H Ramthlengliana hoin Central YMA hruaitute an fehchhuak a. Champhai District Police hotute leh Sub Hqrs YMA Champhai hruaituten an tawiawm a ni.
Thawhtanni hian Tlangsam, Zote, Ngur leh Ngur Vengsang leh Bulfek khawtlang hruaitute nen an inkawm a. Vawiin – August 26 hian Hnahlan, N. Diltlang, Khuangphah leh Vaikhawtlang khawtlang hruaitute nen an inkawm ang. Tunkar chhungin Sesih, Lianpui, Leisenzo, Vangchhia, Vaphai, Saikhumphai leh Farkawn khua an fang zui dawn a ni.
Mizoram sawrkar ruahman dan chuan, ramri hrul khaw tinah hian police indahin, kumin September atang hian ruihhlo lo lut tur lakah beihpui hi kalpui tum a ni.
Ruihhlo do beihpui thlakna atan ramri hrul khua tlawh
