Ruihhlo leh a kaihhnawih hrang hrang laka India ram a fihlim theihna tura sawrkar laipui Ministry of Social Justice & Empowerment leh Mizoram State Social Defence & Rehabilitation Board tangdun hnuaia National Action Plan for Drug Demand Reduction (NAPDDR) hmalakna, ‘Nasha Mukh Bharat- Drug Free India Campaign’ kalpuitu District Level Nasha Mukt Bharat Abhiyaan Committee, Undivided Champhai District chu Thawhlehni khan an chairman, district bawrhsap James Lalrinchhana hoin an thukhawm.
Thutkhawma report danin, kumin May 24 khan Champhai Tlangsamah NASHA Mukh Bharat Abhiyaan Health Camp buatsaih a ni a, ruihhlo ngai mi 30 an inentir. Excise & Narcotics Department Champhai chuan sawmna an dawn angin April thla tawp atang khan Champhai Vengthlang Presbyterian Pastor bial chhunga Naupang Sunday School chawhnu inkhawmah ruihhlo that lohna leh a invenna tur inhrilhhriat beihpi an thlak a, neih hmabakna a la awm. June thla chhung hian zirna in leh YMA Branch-ah te ruihhlo chungchang inhrilhhriatna hi buatsaih tum niin, Govt. Champhai College Anti Drugs Cell nen thawhdun dan an ngaihtuah mek bawk.
Ruihhlo do kawnga inzirtirna zau zawk kalpui dan turte, thalai leh khawtlang nuna ruihhloin bu a khuar thuk tawh dante sawi ho a ni a. Ruihhlo ti thar an pung zel leh kum la tlinglo ruihhlo khawih tharte chhanchhuah leh enkawl kawnga pawimawhte sawi niin, hemi kawnga hmalak tawh dan leh hmachhawpte YMA, MHIP leh Home hotute atangin ngaihthlak a ni. Naupang kum tlinglo, a bik taka enkawlna pek ngaite chu ngaihpawimawh zual a tul thu sawi a ni ni a, ngun taka zirchian hmasak nise, an ti. Nu leh pate mawhphurhna leh an hnena zirtirna pek a tul ziate pawh sawi a ni bawk.
Ruihhlo ngaite enkawlna hmun Home hrang hrang kalphung leh inenkawla kawnga hmasawn ngaihna laite sawi niin, June thla chhungin Champhai khawpui chhunga ruihhlo ngaite enkawlna Home paruk tlawhchhuaha zirchian nise, an ti. Home-a thawktute intuaitharna atan training buatsaih turin rawtna siam a ni a. Ruihhlo hmansual leh tawlhruk dona ni, ‘International Day Against Drug Abuse and Illicit Trafficking’ June 26-a hman dan tur sawi a ni.
Nasha Mukh Bharat Abhiyaan- Drug Free India Campaign hnuaiah hian India rama district 272 ah ruihhlo do hmalakna kalpui hmasak a ni a. Nikum August khan district 100 dang belh leh a ni a, tunah district 372 ah kalpui mek a ni. Aizawl, Kolasib leh Champhai district chu Mizoram atanga he campaign kalpuina a ni a; Narcotics Control Bureau leh Ministry of Social Justice & Empowerment kaltlanga national survey neihin ruihhlo hluarna district nia a tarlan zulzuia thlan an ni.
Ruihhlo donaa hmalakna leh hmachhawp thlir
