Ruihhlo donaah nasa zawka hma la turin Excise minister-in kohhrante a ngen

Excise & narcotics minister Lalnghinglova Hmar chuan ruihhlo do kawngah kohhrante chu nasa lehzuala hma la turin a ngen.
He thu hi nimina BDO Conference Hall, Darlawna ruilhhlo do chungchang hmalak zel dan tur sawi hova inrawnkhawmna neihna a hmanpuinaah excise minister hian a sawi.
He hunah hian Darlawn khawchhunga sawrkar department hrang hrang, tlawmngai pawl, Kohhran leh Kohhran thalai pawl hrang hrang aiawhte an tel a ni.
Minister chuan ruihhlo do chungchanga sawrkar hmalakna hrang hrangte tarlangin, Darlawn khawtlangin ruihhlo do an kalpui zelna turah sawrkarin theihtawp chhuahpui a inhuam thu a sawi a; Kohhrante pawh hemi kawngah hian nasa lehzual zawka hma la turin a ngen a. Zirna in, school leh college-ahte ruihhlo ti lo tura inzirtirna nasa zawk kalpui a tul thu sawiin, zirtirtute pawh tan la thar leh turin a ngen bawk a ni.
Ruihhlo do kawngah department hrang hrangte thawhho a tul thu excise minister chuan sawiin, “Ruihhlo do kawngah YMA chuan theihtawp chhuahin tha pawh an thawh hnem a, chutih rualin VC, Kohhran leh MHIP te pawhin ngaihtuahna thuk zawk kan senpui a tul a, hlawhtling tur chuan kil hrang hrang atanga thawhhona tha neih a tul a ni,” a ti bawk.
Excise minister hian Darlawn khawtlangin ruihhlo dona kawnga an hman atan cheng singkhat a hlan a ni.
Inrawnkhawmna hunah hian kalkhawmte atangin Darlawn khawtlang leh a chhehvela ruihhlo leh ruihhlo ngaite dinhmun tarlan a ni a. Ruihhlo do kawnga hmalakna awm mek leh harsatna an tawh hrang hrangte, ruihhlo do kawngah sawrkar, khawtlang leh Kohhran tanrual a tulziate sawiho a ni bawk.