Ruihhlovin Mizoram a tibuai a, a ram pumpin ruihhlo hian min tibuai a ni ber mai a. Ruihhlo vanga kawng hrang hranga kan tuar dan hi sawi mai sen pawh a ni lo ang.
Mizoram hi ruihhlo tawlh kawng a ni mek a, excise force te leh police te’n ruihhlo an man zingah hmun danga mi tur a tam tih an sawi a, hei hi ngaihtuah chian a ngai hle.
Ruihhlo la turin hmun hla tak tak atangin Mizoramah an rawn kal a, hmun hla tak taka mi tur ruihhlo Mizoramah a rawn lut thin a. Kan ram, pi leh pute sah zauh hi ruihhlo tawlhna hmun a ni mek a, hei hi pawi tih tur, na pawh tih tur a ni.
Ruihhlo vanga harsatna tawkte an khawngaihthlak a, engtin nge kan chhanchhuah ang tih hi beng sika ngaihtuah a ngai a ni. Sorkar hian kal dan tur ngaihtuah se, chutiang duang thei turte sawm khawm se, an duan dan chu zui ila, kan ziaawm deuh ngei ang tih a rinawm. Mahni seh seh muala che ringawt lova a ram pum huapa ke kan pen rual te pawh a ngai a ni. Chutianga kan kal theih dan tur chu sorkar hian ngaihtuah se, zaah za kan hlawhtling lo a nih pawhin thui tak chu kan hlawhtling mai lo’ng maw?
A ti mekte chhanchhuah hna tlukin a la ti ve lote ven hna pawh thawh a ngai a, hei hi ngaih pawimawh a ngai hle mai.
Kan hriat theuh angin Mizoramah ruihhlo a hluar a, zalen takin an zuar ti hiala sawi theih khawp a ni. Chutiang karah chuan tleirawlte leh thalaite’n hun an hmang a, an tluk loh dan tur kan ngaihtuah a ngai a ni. Chhungkuaah, khawtlangah, kohhranah a invenna lam hi ngai pawimawh sauh sauh ila, a la ti ve lote tinzawna ruihhlo do hi kan mamawh hmasa a ni tih kan pawm tlang ngei ang, heti lama tan kan lak sauh sauh pawh a ngai a ni.
Ruihhlo dova tan sauh sauh a ngai
