Dr. C. Lalrampana
A KAMKEUNA
Ruihhlo ngawlvei hi Bible-ah hian chiang taka sawi a ni lo. Bible hun lai khan mi thenkhat chuan ruihhlo an hmang a, chu chu mushroom ang chi hallucinogenic substances-te hi a ni a, mahse Bible-ah hian ruihhlo ngaite hming tarlan a awm lo. Bible chuan ruihhlo ngawl vei hlauhawm thu a sawi a, mahse zu lam a sawi uar ber a, Thuf. 20:1-ah chuan- “Uain chu nuihzatbura min siamtu a ni a, zupui hi insual bung bungna a ni a, chumi buma awmte chu mi â an ni” tih thu a tarlang. Bible hun lai khan ruihhlo hman sual aiin zu hmansual hi a tam zawk a ni tih a hriat theih. Catechism (CCC 2290)-a tarlan a nih danin Roman Catholic Church chuan meizuk hi a dem hran lova, chutih laiin mei heh lutuk chu sualnaah a ngai thung. Bible-ah hian cannabis emaw, a chi emaw chungchang chiang taka sawi a awm lo nain, Israel rama mite chuan BC 750 vel atang tawh khan cannabis hi an ching a, intihhlimna atan an lo zu tawh thin a ni thei a, chu chu Assuria-hoin an awp hma kum 20 kal ta khan a ni. Zuk leh hmuam hi April 13, 1699 khan Indian Sikh sawmna hnuhnung berah Shri Guru Gobind Singh-a chuan a khap a, Sikh zawng zawngte chu meizuk khap an ni. Gobind Singh-a chuan: “Uain hi a tha lo hle a, Indian ziza hnang ruih theih (hemp-bhang) hian thlah khat a tichhe vek a, mahse zuk leh hmuam hian thlah zawng zawng a tichhe vek thung a ni” a ti. Lal Davida hi Bible-a sex addiction entirnan a lar ber a ni. Lal Davida chu “Pathian thinlung ang pu mi” tia sawi lar tak a nih laiin, a tlem berah nupui hming nei 8 leh hming tarlan loh nupui leh hmei tam tak a nei bawk. Bible chuan zu chihrang hrang hman sual hi a khap tlat a ni.
RUIHHLO CHU ENGTE HI NGE NI? Ruihhlo hi mi rilru emaw taksa dinhmun tidanglam thei thil a ni. Thluak hnathawh dan te, rilru put hmang leh awm dan te, hriatthiamna leh hriat rengnate a nghawng chhe thei a ni. Hei hian sawi lawk theih loh leh natna maksak hlauhawm tak a siam thei a, a bik takin thalai tan leh thanglai tan a pawi lehzual bik thin a ni. Heng ruihhlo kan tihte hi engte hi nge tih tarlang ila: Zu, Heroin, Ganja, Methamphetamine, Crystal meth, khuh damdawi, Alprazolam, Opium, Codeine, dextropropoxyphene, dihydrocodeine. fentanil. hydrocodone, hydromorphone. Ketobemidone. Morphine, Oxycodone, Pethidine, Tilidine, Trimeperidine, nicotine, cannabis, ayahuasca, amphetamine, ecstasy, sniffing glue, inhaling paint thinner, mushroom, Vaihlo (tobacco), proxyvon, Kuhva (betel nut) etc.-te an ni. Tin, heng gutkha atanga siam tiranga leh sikhar, sahdah, khainite leh thingpui, coffee-te thleng hian ruihhlo (drugs) hian a huam vek a ni. Mizoram bika ruihlo kan hman lar deh deuhte chu: Heroin, crystal meth, pacitane (pepe), Respira D, Codeine,Cataspa, Heroin, dendrite,parvon Spas, Spasmodic proxyvon, Corazepam, Diazepam, Peptic, Nitrosun, methamphetamine, ganja, kuhva (pankhawr), sahdah, khaini, meizial, proxyvon, alprazolam, leh zute an ni. Sakhw puithiam rawngbawltute leh mihlim rualte pawh ruihhlo lakah hian an fihlim lo hle tihna a nih chu? Kan thalai rual ruihhlo bawiha tang mekte chhan chhuaktu tur bik inthlang chhuak dawn ta ila, hmalak ngaihna a va han vang dawn em! Khawvela opium siamtu number 1, Afghanistan hi opium sumdawnna hmunpui a ni a, tunah chuan a opium thenkhat chu heroin-ah a siam tha leh ta a ni. News report pakhat chuan ram chhunga mi maktaduai 35 zinga mi maktaduai khat chu ruihhlo ngawlvei an ni tih a chhut. India-ah chuan Punjab hi ruihhlo ngawlvei state hmingchhiatna ber a ni. He category-ah hian hmarchhak state Nagaland,Mizoram, Arunachal etc kan lang pha ve mek bawk. India rama Kristian tamna ber Nagaland leh a dawttu Mizoram kan lang ve zel mai hi chu a zahthlak takzet a ni.
ZU KHAPNA DAN
Kum 17 kal taa Mizoram state chhunga zu khap burna Total Prohibition Act, 1995 chu a thlakna tur MLPC Act-2014 chu July, 2013 khan state Assembly-in a siam a, MLPC Rules, 2014 chu Nov. 2013 khan state Assembly-ah pharh a ni bawk. The Mizoram Liquor Prohibition Act, 2019 chu May 28, 2019 atanga hman nghal theih tura ruahman a ni leh ta a ni. Zu khapna dan pawh kan nei thain kan ngah nalaileng tawh e! He dan tharlam berah phei hi chuan-’Mizoram state chhunga chanchinbu emaw magazine emaw tihchhuaha tarlan angin zu emaw, zu atana hman tlâk inbuatsaihna emaw, hman dilna emaw, zawrh tura rawtna emaw advertisement engmah mi tumahin a tichhuak tur a ni lo a, tihchhuahtir tur a ni hek lo tih chu he dan Section 2 clause (b)-ah tarlan a ni. Hetih lai hian tun hnaiah Mizoram pumah zu vanga thi mi 438 an awm tawh a, chung zingah chuan hmeichhia 77 an tel. Mizoram Liquor Prohibition Act, 2019 hi sorkar hmasain a lo puan tawh kha a ni a. Aizawlah hian dan lova scientifically manufactured local liquor siam leh zawrh chhunzawm zel a ni a; Amawii bakah sapzu chihrang hrang man tur a tam tual tual a, zu ngawl vei an tam tual tual bawk. Gospel camping, crusade, bethel, camping center leh home hrang hrang kaltlangin zu ngawl vei tan Counselling buatsaih ni thin mah se, kar 1-2, thla hnih khat bak an daih meuh lova ngai an awhleh thuai thin. Simna tello pianthar sâwt lohzia a lang chiang hle mai.
TU TE NGE DRY STATE CHU?
Tunah hian India ramah dry state paruk awmin zu khapna famkim dan siam a ni. Chungte chu: Nagaland, Lakshadweep, Bihar, Gujarat, Manipur leh Mizoramte an ni. Gujarat hi ram vawt tak a ni a, a chhan chu history, culture leh social factor hrang hrang inzawmkhawm vang a ni a, Mahatma Gandhi-a’n nasa takin insumtheihna a zirtir thin avangin zu in hi India rama khawtlang harsatna thlentu niin an ngai a Gujarat hian zu a khap ve phah ta a ni. Nagaland state chu dry state a ni a, kum 1989 khan Nagaland Liquor Total Prohibition Act (NLTP) hmangin zu zawrh leh in khap a ni. Lakshadweep: India rama Union Territory zingah zu zawrh leh in khapna awmchhun chu Lakshadweep a ni bawk. Anni state 2 hi zu zawrh leh in khapna awmchhun a ni. Amawii leh sapzu mana leih buak a tam tawh tehlul nen “sim ta’nge” ti tumah an awm chuang lova an pung tual tual zawk niin a lang.
ZU TAMNA VE THUNG
India ramah chuan Karnataka hi zu hralh tamna ber state a ni a, kum 2022-23 chhung khan case nuai 6.87 hralh a ni a, mahse a tam zawk chu value segment-ah a ni. Delhi National Capital Region (NCR) leh Mumbai metropolitan region chu market lian ber an la ni chhunzawm zel a, zu sumdawnna hmun thuma thena hmun hnih an luah niin Giri chuan a sawi. Hetih lai hian mipui tam zawnga chhutin Mizoram hi zu zawrh leh hralh tamna ber niin a ngaih theih. Zu hi man rêm chi pawh niing a lang lo, zu khapna dan nei tha pawl tak ni mah ila zu hi a hlu tual tual a, zuar an tam tual tual niin a lang. Chuvangin, Karnataka state ang law law khuan State hausakna lawih khawpin chhuah zalen mai zawk hi a dik ang em? Ngaihtuah zui tham a awm ta e. ZPM Ministry din tirh khan Excise Minister khan zu leh ruihhlo khap rêm a tumzia thu a sawi a, mahse, a tam zual sauh chu a nih hi?
RUIHHLO VE THUNG
Mizorama ruihhlo tawlhrukna lian ber: Heroin cheng nuai 90 man kenga mi pathum man an nih khan Heroin kengtu mi pathumte kha Narcotic Drugs & Psychotropic Substances Act, 1985 section kaihhnawih hnuaiah thubuai siamsak an ni. Hei hi kumin chhunga ruihhlo man tam ber cheng nuai 90 chuang man hu vel a nih thu END hotute chuan an sawi. India rama ruihhlo tawlhruk tamna ber kan ni mek. Kum 40 (1984-2024) chhung khan Heroin vanga thi 251, S/Proxyvon vanga thi 1161 leh a dang vanga thi 427 an vaiin mi 1839 nunna chãn an awm a, heng zing atang hian mipa 1616 leh hmeichhia 223 an ni tih END Report thar berah chuan tarlan a ni. Ruihhlo hlauhawm pawh hi man rêm theih a ni lo aniang; an man tam tawh tehlul nen man tur a tam tual tual niin a lang. Ruihlo tawlhruk ching man chhuah apiangte hi tân in lamah thawn liam zel ni thin mah se, an indaih hrim hrim vang nge a khat tawka man tur an awm reng tho niin a lang. A tih rem dan kawng dang dap a hun tawh hle.
A TLÃNGKAWMNA
Zu leh ruihhlo hlauhawm dinhmun kan hre ta. MLP Act 2019 & Narcotic Drugs & Psychotropic Substances Act, 1985 dan tha tak takte neiin lek kawh thin mah ila ZU & DRUGS rui leh zuar an tam tual tual a, thihpui an tam tual tual bawk. Dan bawhchhia case siamsak tâng tura tihte hian sorkar hnathawk aikal la 3365-te ang khan Jail lamah Aitâng an tir ve zel tihna em niang? Nge thih hnua aikal la mi 9-te ang khan zu leh ruihhlo vanga thi tawh mi 1839-te khan an thih hnuah aikal an rawn tir ve ta zawk a ni mai law’ng maw? Heti khawpa zu leh ruihlo do kawngah khawtlang, NGO, kohhran leh Sorkar-in tan kan lak nasat chung pawh hian zu zuar leh ruihhlo zuar an pung tual tual mai hi hriatthiam a va har ta ve le? Mi engemawzat mana hrem thin ni mah se an la sim tak tak chuang lova, a ni telin zu leh ruihhlovin min chim tam tial tial a, naupang lo thang lian turte tan kan Zoram hi thanlenna tlak a ni ta lo. Engtia tih zel tur nge tih chu tihtakzeta bengsika ngaihtuah a hun ta hle. Chuvangin, ruihlote hi do vak vak lovin ruihhlo ngai mekte lamah hian tangin tanpui zawk ila, hmelma en mai lovin, an mizia leh sukthlek dan milin kawm ngeihin kai hruai ila, an mamawhte hriatpuiin duat tak leh hmangaih takin enkawl ila, thangthar ruihhlo ngai an pun hluai hluai loh nan social activities kan ngah lutukte hi titawp then ngam ila, mahni in lamah nu leh pate bulah khawsa tam theuh se, Pathian thu nen an thlarau nun chawm zawk ila, zawi zawiin ruihhlo ngai an tlem tial tial ang a, kan thalai rual tam tak kan chhanchhuak thei zawk dawn a ni. Hetih rual hian ruihhlo tawlh chingte leh zuar chhawng thinte hi an phu tawk hremna pek zat zat thin ni bawk se, a theih phei chuan khawtlangin ensan hmak hmak ngam zel bawk ila, tun ai hian ruihhlo hian kan ram hi a tibuai nep deuh zawk ngei ang.