Ruihhlo hi hmuhsitawma siamtu – Lalduhoma

Ruihhlo chuan a chhe lam hlirin mihring a hruai thin a, hmuhsitawm taka siamtu a nih avangin tih chhin loh a tha ber tih chief minister Lalduhoma chuan a sawi
Foundation For Drug-Free Mizoram-in “Ruihhlo tel lo nun duhawm zawk” tih thupui hmanga Mizoram tuamchhuaka kumpui lingleta ruihhlo that loh zia inzirtirna tleirawl/rawlthar zinga a kalpui mekah, June 16 – Pathianni khan Zarkawt Presbyterian Kohhran Youth For Christ Inkhawmah hun an hmang a. An pawl patron a nih angin chief minister hian a telpui.
Rihhlo tih that lohna sawiin, ruihhlo chuan a chhe lam hlirah mihring a hruai thin a, kan nih tur ang min nih tir lo tu leh hmusitawma min siamtu a nih avangin tichhin lo turin a sawm tih a sawi. Mizoram sawrkarin ruihhlo chu tih takzeta a do dawn avangin Mizoramah ruihhlo zuar leh timite an chep tawh dawn a, Foundation For Drug-Free Mizoram hmalakna chu theihtawpin sawrkarin a thlawp dawn tih a sawi.
He pawl dintu V Lalnunthara chuan kum 100 chhungin Mizorama khua awm zawng zawng tlawhchhuah an tum a. An pawl hmalakna chuan kohhran indaidanna a thiah avangin he rawngbawlnaah hian Pathian a tel ve tih a sawi. Resource person Moses Lalremruata’n zirtirna a pe a; he pawl life member, Miss Mizoram 2024 runners up Becki Vanchhawng chuan tleirawl mi 150 te chu an duhthlanna ngeiin ruihhlo laka fihlim turin a intiamtir a ni.