Mizoramah heroin a hluar a, man pawh an man hnem. Tun hnai kum hnih kum thum vel chhunga an man zat hi mak tih tham a ni a, kumina an man tawh zat pawh mak tih tham a ni.
Mizoram Excise & Narcotics (MEN) department-in July thla thleng khan kuminah heroin hi kg 32.191 an man tawh.
2021-ah khan heroin hi a hluar hle a, khami kum khan MEN department hian kg 18.906 an man. Hei hi a hun lai chuan tam tih a hlawh a, mahse kuminah hei aia kg 14 chuanga tam thla sarih chhungin an man tawh. May thla thlenga kumina an man kha kg 28.369 a tling tawh a, thla nga chhunga an manin 2021 kum tluana an man a khum hneh hle tawh.
2023-ah khan heroin hi kg 79.359 an man a, hei hi kum khat chhunga an man tam ber a ni.
Heroin pun chakzia chu, 2019-ah khan MEN department hian kg 12.596 an man a, hei hi kum khat chhunga kg 10 an man tlin hmasak ber a ni. Tun nena khaikhin chuan 2019-a an man hi a lo tam lo tiin a sawi theih ang.
Heroin a hluar tia sawi a nih rual hian thu lawmawm lam pawh a awm tho; MEN department hotute chuan heroin man tur a tam chhan hi ram danga mi tur Mizoramah a luh hnem vang an ti.
Heroin an man nasa a, mahse Mizoramah heroin mamawhna a sang thur thur tihnaah an ngai lo. Mizorama heroin an manah hian Mizoram pawna mi tur a tam a, vawi khata tam thama an man phei hi chu ram pawna mi tur a lo ni deuh zel an ti.
Mizoram hi heroin tawlh kawng a ni a, khawchhak lama heroin, khawvel hmun danga mi tur an tawlh kawng a nih avangin Mizoramah heroin hi a lut hnem an ti. Heroin vanga an manah pawh hnam dang an pung telh telh.
Heroin vanga an man, Mizoram mite hi a neitu tak tak an ni lo fo a, tam thama lo kawl an mante phei chu a neitu an ni lo tlangpui a, a neitu pawh hre pha lote an ni an ti.
Ruihhlo hlauhawm heroin man belh zel
