Nimina CYMA hruaitute leh MJA member-te inkawmhonaah, tunhmaa heroin penicillin bur khat man a niha ‘tam’ tia sawi a nih thin dan CYMA President-in a sawi a. Chu chu nasa taka YMA-in ruihhlo a do tan lai kha a ni. Hun a lo kal zel a, ram leh hnam humhalh kumpuan hnuaiah ruihhlo dona kalpui chhoh zel a ni a, chuti chung chuan ruihhlo hian kiam lam pan ahnekin, tunah chuan penicillin bur khat ni lovin tum khatah Kg 2/3 man tur a awm ta nawk mai. Heroin Kg khat chu penicillin bur sang chuang hu a ni.
Mizoram Excise & Narcotics department-in kumin July thla thlenga heroin an man zat chu Kg 52.854 a tling tawh a. Kum 2021 leh 2022 chhunga heroin man belhkhawm (52.324Kg) aiin a tam tawh zawk. Kumin October thlenga heroin man zat hi Kg 74.220 a tling tawh a; kum hnih kaltaa heroin man belhkhawm aia a tam zawkna hi Kg 21.896 a ni. Kumina thla hnih (Nov&Dec) lo la awm turah hian Kg100 a tlin theihna chance a sang hle tihna a ni.
Heng heroin manchhuah tam zawk hi chu Mizoram paltlanga hmun dang panpui tur nia sawi a ni na a, manchhuah loh engemawzat la awm tura ngaih a nih bawk avangin heti zat zatin min chim reng chuan ruihhlo ngai an pung ngei ang tih a rinawm.
Heng ruihhlo lo luhna Khanpui lo dan chah dan tur hi ngaihtuah a ngai a, chumi atan chuan force chak tak din a ngai ang a, Mizoram sum hian a tlin dawn lo tih hriatsa a nih avangin central lam puihna hi dap dan ngaihtuah a pawimawh hle dawn a ni.
Hetih lai hian, ruihhlo laka fihlim tura naupang leh thalai thang chho mekte hi uluk taka kan enkawl a, thiam taka kan control (demand reduction) a pawimawh hle tih a lang a, he lamah hian sawrkar, kohhran, khawtlang leh pawl hrang hrangte hi systematic taka kan thawhho thiam a ngai dawn a; a pawimawh ber erawh chhungkua atanga beihpui thlak a ni awm e.
Ruihhlo hluar chak dan hi…
