Ruihhlo ngai camping-ah
Ruihhlo Do Ni an hmang
June 26 kha International Day Against Drug Abuse & Illicit Trafficking a ni a, hemi pual hian Mizoramah pawh a kaihhnawih department-in kawng hrang hrangin an hmang.
A hmanna pui berah Synod Revival Camping Centre Neihbawi-a ruihhlo ngaite tana chhanchhuana camping ‘Hulhliap Short Stay Centre’ neihah Social Welfare minister Lalrinpuii leh Excise & Narcotics minister Lalnghinglova Hmar hoin hman a ni.
Social Welfare minister chuan ruihhlo avanga mipa an kiam chak chu veiawm a tih thu a sawi a. Ruihhlo ngai Centre-a awmte chu insiamthatnana hmang turin a chah. Tihdam aiin invenna a tha zawk, tiin, ruihhlo that loh zia tlangaupui tur leh invenna lama nasa zawka tan la turin a chah bawk.
Excise & Narcotics minister chuan sawrkar, kohhran leh tlawmngai pawl tanhona zara Hulhliap Short Stay Centre siam a ni chu lawmawm a tih thu sawiin, Covid-19 hriin min chimbuai vanglai, sawrkar pawh a chet hleihtheih tawh loh hnua kohhran hmalakna kan hmuh ang kha ruihhlo do kawngah pawh hmuh leh theih nise a duh tih a sawi a ni.
Synod Revival Camping Centre-ah hian ruihhlo ngaite enkawlna tur ‘Hulhliap Short Stay Centre’ hi kumin June 23 atang khan kalpui tan a ni a, ruihhlo ngaiten an ruihhlo tih thin lak atanga an inthuahfaina (detoxification) leh an taksa leh hriselna tih thatna (basic health care) tur hmun niin, ni 15 chhung a thlawnin doctor, nurse leh counsellor-te enkawlna hnuaia an awm hnuah, ni 5 chhung gospel camping-ah an lut nghal dawn a ni. Centre-a enkawl hun chhung a zawh hunah chhungte hnena haw leh theihna tur leh Rehabilitation Centre-a awm zui duh pawh ngaihtuahpui an ni dawn a ni.
International Day Against Drug Abuse & Illicit Trafficking hi 1987 December-a UN General Assembly-in resolution a pass anga khawvel puma hman zui tak a ni a. Kumin thupui chu “Breaking the chains: Prevention, Treatment and Recovery for all” tih a ni.
Ruihhlo ngai camping-ah Ruihhlo Do Ni an hmang
