Ruihhlo ngaite enkawl a, eizawnna tlak thiamna an neih theihna turin Home awmsa thenkhat thawmthat tum a ni. Mizorama ruihhlo do kalpui dan thlirlet leh kalpui zel dan tur relin Inrinni khan chief minister Lalduhoma kaihhruaiin an thukhawm a. Home minister K Sapdanga, Excise & Narcotics minister Lalnghinglova Hmar Home secretary leh hotu dang, Excise & Narcotics secretary leh hotu dang leh Central YMA hruaitute an tel.
Chief minister chuan ruihhlo do kawnga chak zawka hma lak a nih theihnan Mizoram sawrkar chuan December 2024 khan Saitual, Khawzawl leh Hnahthialah Excise & Narcotics Station a hawng a, rel luhna Sairang leh Bairabi-ah Excise Station hawn phalna peihfel a nih bakah 2025 March 14 khan Excise & Narcotics department-a thawktute chetvelna tur lirthei 18 lei a nih bakah indaih lohna zualpui phuhrukna atan sawrkarin LMV pathum a ruahman leh tih a sawi a ni.
Excise & Narcotics Department-a thawktute indaih lohna phuhruk turin post 16 siam thar a ni a, direct recruitment hmangin mi 28 lak an nih tawh bakah mi 39 la leh turin inbuatsaihna a kal mek tih a sawi a. Kum 2025 chhung khan ruihtheih thil chi hrang hrang kaihhnawihah case 319 ziahluh a ni tih a sawi bawk.
Ruihhlo chu hnam hmelma lian ber a nih angin a do kawngah pawh sawrkar leh khawtlang tanrual a pawimawh tih Lalduhoma hian sawiin, Mizorama ruihhlo lo lue dan chah a nih theihnan Home department, Excise & Narcotics leh Central YMA tangho chuan, 2025 September 1 khan ramri hrul khaw 22-ah ‘Operation Jericho’ kalpui a ni a. September 1 atanga kumin January 13 thleng khan ruihhlo cheng vaibelchhe 196.42 hu man a ni tawh tih a sawi a ni.
Home minister pawhin ruihhlo do kawnga Excise & Narcotics Department tha tichak tura Home department bakah Central YMA tha thawhna chuan awmzia a nei thui hle tih a sawi a. Aizawl bakah district hrang hranga ruihhlo tih remna tura sawrkar an thawhpui thinnaah lawmthu a sawi tih a sawi a ni.
Excise & Narcotics minister chuan inbiakpawhna leh inkalpawhna kawnga hmasawnna avangin Mizoram chuan zinmi tam zawk a hip mek zel a. Aizawl hmun laili leh a chhevela ruihhlo ngai, hmuh nuam lo tak tak awm thinte chuan zinmite rilruah Mizoram hmel a tih balh phah theih tih a sawi. Ruihhlo do remna kawngah leh ruihhlo ngaite enkawlna kawngah Excise & Narcotics Department chuan sawrkar deparment dangte, YMA leh khawtlang thawhpuina a mamawh takzet tih a sawi a ni.
Central YMA general secretary Prof. Malsawmliana report danin, 2025 December 10 khan kumpuan hawn a ni a. Police nen tangrualin, December 10 atanga kumin January 12 chhung khan ruihhlo ngai, khawlaia tei rawlai mi 192 khawmin Home-ah mi 85 dah luh an ni. Central YMA hnuaiah January 20 khan Central Anti Drugs Squad member 24 awmna din a ni a, Aizawl khaw chhung zone 10-ah thenin an vil dawn a ni.
Thutkhawmah hian ruihhlo ngaite enkawl a, eizawnna tlak thiamna an neih theihna turin home awmsa thenkhat thawmthat dan tur sawiho a ni a. Ramri hrul, ruihhlo luh tamna hmuna ngaihah police outpost siam belh dan tur rel a ni bawk.
Ruihhlo ngai enkawl leh chhawmdawl zuina atan home thenkhat chei dawn
