October ni 26 khan Champhai Police te’n ruihhlo hmun hrang hrang atanga an man hal ralna hun chu District Hospital Complex-ah neih a ni a, Seju P Kuruvilla, IPS, IGP (ANTF), Mizoram chuan he hun hi a hmanpui.
Ruihhlo halral takte hi Champhai Police te’n hmun hrang hranga an man, District Court-in halral tura phalna a pek tawhte a ni a. September, 2025 atanga February, 2026 inkara hmun hrang hranga an man khawm niin, Heroin 4.350 Kg (A hlut zawng Rs. 8,70,00,000/-) leh Methamphetamine 9.391Kg (A hlut zawng Rs. 7,51,28,000/-) a ni a, heng kaihhnawihah hian ND&PS Act hnuaiah case 23 ziahluh a ni.
Seju P Kuruvilla chuan Champhai District chu border district a ni a, India rama ruihhlo lut tam zawk chu Zokhawthar leh Champhai kaltlanga rawn lut a nih avangin Champhai Police-te chuan ruihhlo dona kawngah mawhphurhna pawimawh tak an nei tih a sawi.
Ruihhlo tawlhruk dan chah mai ni lovin, a cartel lian zawkte ram chhung leh ram pawn inkungkaihna neite chu mobile phone leh bank account kaltlanga chhui chian zel an nih theih nan Bank thuneitute nen thawh hona tha tak neih a pawimawh thu a sawi a. Ruihhlo dona chak zawka a kal theih nan Sawrkar Laipui leh State Sawrkar hnenah thawktute mamawh thlen chhoh zel a ni, a ti a. Police-te thiamna tihpun leh dan tharte an hriat zel theih nan training regular taka neihpui tum niin, NDPS Act hnuaiah dan bawhchhetuten hremna an hmuh ngei theih nan dan tha taka hmang thin turin kalkhawmte a fuih a ni.
Ruihhlo Vbc 15 chuang hu hal ral
