Ruihhlo zuara kan hnam sawptute sawp let ve a tul – Central YMA President

Ruihhlo zuara kan hnam
sawptute sawp let ve a tul
– Central YMA President
Ruihhlo zawrh avanga kan hnam sawptute kan sawp let ve a tul takzet tawh tih Central YMA president R Lalngheta chuan a sawi.
Inrinni zana YMA Khankawn Branch-in YMA kumpuan – ‘Ruihhlo Do’ a hawnnaah Central YMA president chuan, ruihhlo do chu mi huat hlawh theihna a nih rualin, kan ram leh hnam tana thil pawimawh tawpkhawk a ni tih sawiin, “Kan thalaite ruihhlo avanga nunna chan mek chhanchhuak tur hian hruaitute kan huaisen a ngai. Ruihhlo zuarten an thiltih an zahpui loh chuan, eng vangin nge keini’n do kan zah bik ang? ‘Thian chhan thih ngam’ kan tih thin hi a taka hman a ngai a, ruihhlo zawrh avanga kan hnam sawptute hi kan sawp let ve a tul takzet a ni,” a ti.
Ramria police-te thuam chak a pawimawh, tiin, ramri-a YMA-ten duty post an siam chuan awmzia a neih tel a beisei tih a sawi a. Thil dik lo titute laka case khauh tak kan siam duh a nih chuan, dan zawm chunga hma lak a pawimawh tih a sawi bawk.
India ram hmun dang lakah Mizoram chu ruihhlo leh HIV/AIDS-ah kan dinhmun a sang hle tih R Lalngheta hian a sawi a. Hnam damna tura kan chetchhuahna chu Pathian rawngbawlna a ni, tiin, “Kan choka a kang mek a, kan inpui a kankai hma in kan tan a ngai,” a ti.
Khankawn hi Manipur luh dawna Mizoram khaw tawp ber a nih avangin, ruihhlo do kawngah YMA branch tangkai tak leh mawhphurhna lian tak nei an ni tih sawi a ni.
Manipur Group YMA-in Inkhawmpui vawi 41-na tawp zan, Lamka Branch YMA Hall, Churachandpur-a neih a hmanpuinaah Central YMA president R Lalngheta hian, Mizote chu hnam tlemte kan ni a, YMA chuan he hnam tlemte hi pumkhata awm an duh ber tih a sawi.
“Inpumkhat tur chuan nang leh kei hi kan pawimawh a, chibing te te a inla hrang loin, hmun khata awm turin ka sawm che u a ni. Mizoah hian hnam hrang hrang kan awm a, i inpumkhat ang u, unau kan ni a, i in do lo ang u,” a ti. Mizo hnam peng hrang hrangten kan tawng theuh humhalh chungin, kan inbiakpawhna tawng tlanglawn erawh kan thiam tlan a tul tih a sawi a ni.