West Bengal Chief Minister Mamata Banerjee chuan April 4 khan BJP te chu Lok Sabha poll atana Model Code of Conduct (MCC) zawm lovah puhin rul tur nei takngial pawh saffron camp te ai chuan an rin theih zawk tihialin a sawi.
Cooch Behar a rally a neihah Banerjee chuan Central investigating agencies, Border Security Force (BSF) leh Central Industrial Security Force (CISF) te chu BJP tana thawk an ni tia sawiin Election Commission of India (ECI) chu party tin ten ‘level playing field’ an neih theih nana hmala turin a ngen bawk.
“BJP te chuan Awas Yojna atana inziaklut turin an ti leh tawh che u. Eng vangin nge hming ziahluh leh a ngaih? Hming ziahluh an tihlehna chhan chu an paih theihna tur che u a ni. Rul tur nei chu a khwi theih a, pet ang pawhin a hman theih a, mahse BJP te chu an rintheih loh. BJP te hian ram an tichhia a ni” tiin a sawi.
A party TMC chu ‘Central agencies vauna’ lakah a kun hniam dawn lo tia sawiin Banerjee chuan Cooch Behar hmeichhia te chu BSF tena tualchhung mi te inthlan hmaa an sawisak emaw hlek chuan police hnenah hrilh zel turin a ti bawk a.
“Central investigating agencies, NIA, Income Tax, BSF leh CISF te hi BJP tana thawk an ni. Central agencies tena saffron camp tana an thawh avagin Election Commission hnenah ‘level playing field’ a awm theih nan ngenna kan siam a. BJP te hian MCC an bawhchhia” tia sawiin, “BJP te hian one nation, one party principle an kalpui a ni” tiin Banerjee chuan a sawi bawk a.
“Thubuai hrang hrang nei mek Minister of State for Home Affairs atan dah hi ram ang pawhin a zahthlak a ni. Kan party atanga kan hnawhchhuah a ni a, tunah chuan BJP te rohlu a ni mek” tiin Nisith Pramanik chungchang a sawi a.
Pramanik chu leader of the Trinamool Congress (TMC) Youth Congress ni thin niin kum 2018 khan party atanga hnawhchhuah a nih hnuah BJP a zawm a ni.
Cooch Behar SP hlui Debashis Dhar chu Birbhum MP candidate atana BJP tena an ruat chungchangah Banerjee chuan, “BJP te nihna dik tak chu kum 2021 Assembly poll laia Sitalkuchi a mi panga in nunna an chanphahnaa mawhphurtu candidate atana an ruat hian a tifiah vek a ni” a ti bawk a. Dhar hi Assembly poll hnuhnung berah khan Cooch behar SP a nih lai a ni a, a hnuah suspend niin compulsory wating a dah zui a ni.
State ah Citizenship Amendment Act a kalpui duh loh chhan sawifiah bawkin banerjee chuan CAA chuan a diltu chu foreigner angah a chhuah nghal tia sawiin tumahin dil lo turin a ngen bawk a.
BJP te chu ‘Jumla’ party ti bawkin TMC supremo chuan saffron party chu CAA chungchangah dawt thehdarhah a puh bawk a.
“CAA hi dan ang thlapa khua leh tui te foreigner a chhuahna a ni. CAA kalpui hnuah NRC in a zui ang a. West Bengal ah chuan CAA emaw NRC emaw kalpu kan remti dawn lo. In dil a nih chuan foreigner anga ngaih inni nghal ang” tiin Banerjee chuan a sawi bawk.
CAA committee a Census Department member dah a ni chu zawhna a nei bawk a, “NRC kalpui tum lo se eng vangin nge Census Department aiawh member an dah? CAA hi a lu a ni a NRC hi a mei a ni” tiin Mamata Banerjee chuan a sawi bawk.
Rul a rin theih, BJP a rin theihloh : Mamata
