Ruling VC nih kher a ngaih loh
thu ZPM hotuten an aupui tawh
– MPCC thupuangtu
ZPM hotuten local council leh village council-ah ruling party candidate kher thlan tlin an ngaih loh thu kum 2020 chho khan an lo aupui daih tawh tih Congress thupuangtu Dr Lallianchhunga chuan a sawi a. Finance Commission-in an sum chan tur a bithliah fel sa a nih avangin, state-a sawrkar lai kalsual tur vengtu atan tualchhung sawrkarah opposition VC/LC awm se a tha zawk tih a sawi.
MPCC thupuangtu sawi danin, 2020 March 8 khan Sesawnga ZPM buatsaih vantlang inkhawmah tuna chief minister ni ta Pu Lalduhoma hian, khaw tin chan tur budget siamsa vek a ni tawh a. Ruling neih kher a tul tawh loa, ruling leh opposition VC-te chan tur a inang reng tawh, tiin a sawi a. ZPM president Pu Lalliansawta pawhin 2020 August 8 khan thuthar thehdarhtute a kawmnaah, state sawrkar zenpui theih loh turin khawtin chan tur thenfel vek a ni tawh a. State sawrkar pawhin State Own Tax Revenue atangin 15% chu VC-te chan turin a dah ngei tur a ni a. Chuvangin, ruling VC nih vangin hamthat fal bikna tur a awm tawh lo, tia a sawi thu a sawi bawk.
ZPM sawrkar hnuaia Mizoram hmasawnna atana kan mamawh chu opposition VC a ni tih sawiin, “ZPM worker-ten khawchhunga leh vengchhunga hna an thawhte hneh taka lo vil thei tur opposition VC tha kan mamawh a, chu chu Congress party hian Zoram mipui kan tiam a ni. Ruling VC leh ruling worker-te inkarah inendik (check) tawn theihna a awm that a beisei awm loh avangin hmasawnna tha leh tlo duh khua tan chuan opposition VC thlan mai a tha ber ang,” Dr Lallianchhunga hian a ti.
Sawrkar laipui Finance Commission-in tualchhung sawrkarte chanvo a bithliah fel vek tawh avangin opposition VC leh LC tan hmasawnna hna (development works) tam tak a thawh theih tawh a. Ruling VC nih vanga fachuam hamthatna dawng bik tura inngaih tur a ni tawh lo tih a sawi a. “VC ni turin ruling kher nih a ngai tawh loa, ruling VC leh opposition VC ten chanvo inang an chang tawh. Hei hi ZPM hotute ngei pawhin opposition an nih laia tui taka an lo sawi tawh thin kha a ni,” a ti.
Khua leh veng hrang hrang atangin Congress party-ah ‘haw runpui’ a thleng mek niin Congress thupuangtu hian a sawi bawk a. Congress party-ah mipuiin beiseina an nei thar hle tihna a ni tih a sawi.
AMC corporator Rosiamngheta pawhin local council inthlan turah state-a sawrkar laiin hmasawnna hmathehin a zuar mek a, an party thawhpui theih thlang turin mipui an nawr nia sawiin, “Local council (LC) a thlangtling a, hmasawnna min tiamtute hian hriatfuh loh an nei. LC kaltlang lo pawhin hmasawnna hi kan vengah an rawn thawk thei a, sawrkar nen inzawmna an nei lem lo. LC hna chu municipal tih tur tuk leh vengchhung mipui inrelbawlna enkawl a ni a. Sawrkar inrelbawlnaah LC a inrawlh bik lo. Chuvangin kan vengah theuh kan chunga roreltu atana tha kan tih hi Aizawl Municipal leh Lunglei Municipal hnuai amite hian vote ang u,” a ti.
Ruling VC nih kher a ngaih loh thu ZPM hotuten an aupui tawh – MPCC thupuangtu
