Russia-a Indian chin hriat lohte sipaia tan luihtir niin sawi

Russia-a Indian chin hriat lohte sipaia tan luihtir niin sawi
Uttar Pradesh khawthlang lama Indian pathum chu an passport laksak an nih hnuah Russia-ah chin hriat lohvin an awm mek a, an chhungte chuan Ukraine indonaa ral beihnaa tel turin sipaia tan luihtir niin an sawi.
Kum 24 mi, Himanshu Sharma leh kum 23 mi, Shakti Punder te hi Muzaffarnagar-a mi niin kum 25 mi, Ashu Saini-a chu Shamli-a mi a ni ve thung a. July 30-a chiai tih hriat taka Moscow atanga an chhungte an phone hnuah biakpawh theih an ni tawh lo nia sawi a ni.
Heng mi pathumte hi Russian tawng zir tura Moscow-a kal an ni a. An chhungte chuan pakhat tan Rs. nuai 3.5 zel chawiin Shamli-a agent kaltlangin an chhuak a, student visa leh part-time-a hna thawh theihna tur tiam niin an sawi.
Saini-a hian intermediate studies a zawh hnuah April-ah Russia a pan a. Sharma leh Punder hi kum khat dam an visa a tawp ruala August-a haw tur an ni ve thung.
July thla tawpa an chhungte nen an inbiak hnuhnung ber chuan an passport-te laksak an ni a, sipaia tan luihtir niin an sawi niin sawi a ni.
Saini-a farnu, Anshul-i chuan an inbiak hnuhnung ber hian second 30 vel chauh an inbia niin a sawi a. A dam that thu a sawi a, a tawp zui a, a hnuah an bepawp thei tawh lo niin a sawi.
Saini-a pa, Rakesh Kumar-a chu lo neitu a ni a, Prime Minister’s Office-ah a thlen tawh a. Punder-a pa, Vipin Kumar-a pawhin district thuneitu leh Uttar Pradesh sorkar hnenah an fapa zawnnaa pui turin a thlen tawh a. “Min biak hnuhnung ber hnuah ka fapa chin hi ka hre thei tawh lo va, thuneitute hnenah lehkha ka thehlut tawh a; mahse, ngaihngamin kan la awm thei lo,” a ti.
Police chuan Russia-a mi pathum kaltirtu, Shamli-a agent hi an chhui zui mek.
July thla khan external affairs ministry chuan Russia-a sipaia tang chhungten Supreme Court-a petition an thehlut thutlukna angin Russian Army-a tang Indian eng emaw zat chu thawn haw turin Moscow nen an lo inbe tawh.
Ukraine nena an indonaah Russian sipaia tang Indian 30 vel thi an awm tawh a. Supreme Court chuan kum 2024-25 chhunga zin leh student visa hmanga Russia-a kal Indian 26, sipaia lak zui tak chhungten petition an thehlut chu a ngaihtuah a ni.