Russia-in Avdiika khua la thei reng tiin sawi

US chuan Russia chuan Ukraine khawchhak lama khaw pawimawh tak Avdiivka chu la thei reng dinhmunah a ding tawh tiin a sawi.
“Avdiika chu Russian thununna hnuaia tlu thei reng a ni” tiin National Security Council thupuangtu John Kirby chuan a sawi a, Ukraine chuan ammunition a tlachham tiin a sawi bawk.
Ukrainian President Volodymyr Zelensky chuan ‘Ukrainian te nunna a tam thei ang ber chhanhim turin theihtawp kan chhuah dawn’ tiin a sawi bawk a.
Russian sipaite chuan Avdiika khua hi hualbetin hma an sawn zel tia sawi a ni a. He khua hi Donetsk bul lawka awm niin khaw pawimawh tak niin Donetsk chu regional Ukrainian capital niin Russia thlawp fighter ten kum 2014 khan la in tunah Moscow awpna hnuaia awm mek tawh a ni.
Russian President Vladimir Putin chuan 24 February 2022 khan Ukraine chu a run tan a, indona la kalpui mekin a awm a ni.
Washington a thusawina a neihah Kirby chuan Avdiika chu ‘Ukrainian forces tena artillery ammunition an neih loh avangin tlu thei reng a ni’ tiin a sawi a.
“Russia chuan sipai rual Ukrainian te bei tur hian a tahtawlin a tir lut reng a, a bei char char a ni” tiin a sawi bawk a. “Congress-in supplemental bill a la pass tlat loh avangin tun dinhmunah chuan Ukraine hnenah artillery shell pe theiin kan awm lo a ni,” tiin a sawi bawk a.
“Russian sipaite chuan Avdiika a Ukrainian trench te an thleng tawh a, Ukrainian sipaite chu an tam hneh mai dawn a ni,” tiin a sawi bawk.
Tunkar tir lam khan US Senate chuan foreign aid package $95 billion a pawm a, heta tanga $60 billion chu Ukraine hnena pek tur a ni a, mahse, House of Representatives a la paltlang a ngai thung.
Ukraine chu US leh Western allies te ralthuam peka innghat bur a ni a, chungte tel lo chuan sipai ngah zawk leh ralthuam nei tha zawk Russia chu dan ngaihna a awm lo a ni.
Nato Secretary General Jen Stoltenberg chuan US-in Ukraine hnena military assistance a pek theih loh chuan indona tualzawlah danglamna a siam mek reng tiin a sawi bawk.
Video kaltlanga thuchah a sawiah President Zelensky chuan, “Kan raldo tena hmanrua leh techonology an mamawh an neih theih nan leh Ukrainian nunna a tam thei ang ber kan chhan theih nan theihtawp kan chhuah a ni,” tiin a sawi.
Zirtawpni khan Zelensky chuan Berlis leh Paris tlawh tura zinchhuak bawkin hetah hian German Chancellor Olaf Sholz leh French President Emmanuel Macron te nen security pacts an ziak dawna ngaih a ni a. January thla khan Ukraine leh UK te pawhin security co-operation an lo ziak dun tawh bawk.
Ningani khan Ukrainian general Oleksandr Tarnavsky chuan Adviika-ah indona turu tak a thleng mek tiin a lo sawi tawh bawk a. “Ukrainian ram tin hi kan ngaihlu em em vek a, mahse, kan ngaihlut ber zawk chu Ukrainian sipai te nunna humhim a ni,” tiin a sawi.
Ukraine military spokesman Dmytro Lykhoviy pawhin Ukrainian sipaite Adviika a awm mek te chuan an hmun thenkhatte chhuahsanin hmun hlauhawm zawkah an lut tiin a sawi bawk a. Hei bakah hian sipai unit tihchak tuma ruahmanna siam a nih thu leh theihtawp an chhuah thu a sawi bawk.
Ukraine’s 110th Mechanises Brigade Adviika area-a awm enkawltu Ukrainian officer Oleksii chuan, “Tun dinhmunah shell hnih chauh kan nei tawh a, mahse chu pawh explosive charges kan nei lo zui a. Shell neih kan nei tawh lo a ni ber” tiin a sawi a. Shell an neih loh avang chuan Avdiika inbeihnaah an chan a chhe lo thei lo tiin a sawi a.
“Kan sipaite chuan theihtawp an chhuah mek a, mahse assault rifles chauh kan nei a ni,” tiin a sawi bawk.
Ukraine commander-in-chief thar Oleksandr Syrskyi chuan Avdiika frontline hi tunkar tir lam khan tlawhin an harsatna te pawh a hmuhpui vek a. Hetih lai hian Kyiv chuan elite Ukrainian brigade te chu Avdiika-ah hian tirlutin resrve artillery te pawh dah luh a tum bawk a.
Russian military blogger chuan Ningani khan southern Avdiika a Ukrainian defence hmun pawimawh Zenit chu Moscow thununna hnuaiah a awm tawh tiin a tarlang thung.
Avdiika hi indona thlen hma chuan mihring 30,000 vel chenna khua niin tunah chuan mi 1,650 vel chauh an cheng tawh a. Mi tam takin an chhuahsan a, tam takin nunna an chan a ni.
He khua military administration hotu Vitaly Barabash chuan tun hi Russia-in a run hnua a sipai tena an hnaih theih lai ber a ni tiin a sawi a.
Nikum October thla atang khan he khua la tur hian Russia chuan theihtawp a chhuah tan tawh a, January thlaah ringawt khan guided aviation bomb 300 chuangin a deng tawh a. Building te chu a tluchhe rem rum tawh a, Avdiika chu thlanmual mai bakah rauhsan khua angin a lang tawh a ni.
Mitthite chu building chimin a delh ang angin dah an ni mai a, thianfai tur pawhin emergency service an awm tawh chuang lo. Russian drone te chuan mihring awmkhawm tamna apiang a beih zel avangin tunah chuan huho pawhin an awm ngam tawh lo tiin Vitaly Barabash chuan a sawi bawk.
Russia-in nasa taka a bei chungin khua chhuahsan duh lova theihtawp chhuaha tang an la awm tlat thung a. Khaw chhungah tanpuitu pawl White Angels te indinin chung mite chuan theihtawpin an theih phak ang angin chhanchhuah hna an thawk thin thung.
Russia-in a beih nasat em avangin mahni sahim nan nikum October thla atang khan mi 400 chuangin an chhuahsan leh tawh niin military administration te chuan an sawi a ni.
Avdiika khua hi Donetsk region luhka pawimawh tak a nih avangin Russia chuan lak ngei tumin a la bei zui ta char char a ni.