Russia-in interest rate tihsan belh

Russia chuan thla 16 chhunga Rouble hlutna a tlakhniam ber a thlen avangin interest rate 12% in a tisang zui nghal.
Russian currency hlutna hian Thawhtanni khan 100 dollar a pel a, hei vang hian Russia-a central bank chuan emergency meeting a nei zui nghal a ni.
Bank of Russia chuan interest rate chu inflation sang tak tihhniam nan 8.5% in a tisang a, August thla hian inflation rate chu 4.4% lai a ni.
Russia-ah hian a thawnchhuah aia a lakluh pun nasat avang leh Ukraine war-a sipai leh ralthuam lama sum sen a tam avangin economy-in harsatna a tawk nasa tial tial a ni.
Bank of Russia chuan thuchhuah a siamah inflation sang avangin rouble exchange rate chu a nghawng tia sawiin hei hi ram dang atanga bungrua chawkluh demand san vang tiin a sawi.
Russia hi Khawthlang ram te chuan February 2022-a Ukraine a run hnu atangin nasa takin a tahtawla hrekna an la kalpui char char a.
Ukraine indo tan hnu lawkah rouble hlutna a tlahniam nghal tawh a, mahse capital control kalpui leh oil leh gas thawnchhuah nasat hnuah a ziaawm deuh zui leh mai a.
Mahse, tunah chuan Ukraine indo hnu atangin US dollar laka hlutna chu nasa tak hloh tawhin US dollar khat lei nan rouble 100 chuang a ngai tawh hial a ni.
Tun hi Bank of Russia-in interest rate nasa taka a tihsan tumkhatna a ni lo va. Ukraine a beih tirh khan interest rate chu 9.5% atangin 20% lawihah a tisang zui nghal a, a hnuah a tahtawlin a tihniam leh tial tial thung a ni.
Tuna interest rate tihsan hian nghawng a nei nghal dawn tiin Liam peach, senior emerging markets economist, Capital Economics chuan a sawi a. “Russia hian hrekna avangin capital flow a nei thei dawn lo,” tiin a sawi bawk.
Ukraine indo chhuah hnuah European Union ram te Russian oil leh gas-a innghatte chuan ram dang atanga oil leh gas an mamawh te chawkluh dan an zawng ta char char zui a. Hei mai bakah hian EU leader te chuan Russia-in oil leh gas thawnchhuah atanga sum tam zawk a lakluh loh nan price cap siam zuiin hei bakah hian international payment system Swift hmang thei lovin an siam bawk.