Russia-in khawthlang ramten Kyiv-a ralthuam an pek thlithlai uluk
United States President Donald Trump-a’n Kyiv hnenah ralthuam a pe chhunzawm dawn tih a puan hnu lawkah Moscow chuan khawthlang ramten Ukraine-a hmanrua an thawnte uluk takin an thlithlai tih Kremlin thupuangtuin a sawi.
Dmitry Peskov-a chuan Nilaini khan Trump-a leh Russian President Vladimir Putin-a te chu phone-a an inbiak lehna tur ruahmanna a awm rih lo va, a rang thei ang bera tih erawh tum a ni tih a sawi bawk niin Russian chanchinbuten an tar lang.
Kremlin-in hetiang a sawi hma ni hnihah khan US president chuan Ukraine nena an indonaah Russia lakah a dawh theihna a tlem tawh hle tih a tilang.
Moscow laka thu a chhakchhuah rum takah Trump-a hian Thawhtanni khan Putin-a’n ni 50 chhung, September thla tir thlenga inremna a la siam thei lo a nih chuan US-in na zawkin a hrek dawn tiin a vau.
Trump-a hian Russia-in a sumdawnpui ramte lakah chhiah nasa taka tisangin khawvel sumdawnna che velah a dah hrang dawn tih a sawi a ni.
November thlaa president inthlana a campaign lai khan Trump-a hian pisa a luah atanga darkar 24 chhungin Ukraine-a indona tihtawp a lo tiam tawh.
Phone-in Putin-a nen hian vawi ruk emaw an inbe tawh a, US thuneitute leh Russia leh Ukraine-a thuneitute ve ve pawh an inbe tawh a; mahse, inkahhai an la puang thei lo.
US hruaitu hian Ukraine hnenah a European thawhpuite kaltlangin US sipai hmanrua chu tluklehdingawn tel man Kyiv-ah a thawn dawn tih a puang.
Ralthuam a pek tur zingah Patriot air defence system pawh a tel a, hei hi Ukraine-in tun hnaia Russian missile leh drone beihna a tawh nasat laia a mamawh tak a ni.
Trump-a hian Ukraine-in Moscow a beih dawn loh thu pawh a sawi a, Ukrainian President Volodymyr Zelenskyy-a chu hmun hla kap thei ralthuam a pek chuan Russian khawpui hi a bei mai thei tih a sawi hnua a sawi a ni.
The Financial Times chuan Thawhlehni khan July 4-a Zelenskyy-a nen phone-a an inbiaknaah Trump-a hian Russian ram ril zawk pawh kap turin a ti niin a tar lang a ni.
Hetih lai hian Thawhlehni zan khan Russian sipaite chuan drone 400 leh ballistic missile pakhat hmangin Kharkiv, Kryvyi Rih leh Vinnytsia telin Ukraine-a khawpui hrang hrang an bei leh.
Mi 15 vel hliam tuar awmin energy hmunte pawh an tichhia niin Ukrainian thuneituten Nilaini khan an sawi.
Kryvyi Rih leh Dnipropetrovsk region hmun dangah chhungkaw 80,000 velin power an nei lo niin Ukraine-a private energy company DTEK chuan Telegram-ah an tar lang.
Ukrainian air force chuan drone tam zawk an kah thlak theih laiin 57-in hmun 12 an kap fuh niin an sawi.
Russia-in khawthlang ramten Kyiv-a ralthuam an pek thlithlai uluk
