Polish Prime Minister Donald Tusk chuan Europe chu “pre-war era” ah a awm mek tia sawiin Europe khawmualpui pum tan Russia chuan Ukraine a hneh tur a ni lo tiin a sawi bawk.
Indona chu ‘tun hma thil ringawt a ni tawh lo’ tia sawiin, “A thleng meka kum hnih kalta khana intan tawh a ni” a ti bawk.
Kar kalta Ningani khan Russia chuan Ukraine energy system chu turu takin a bei a. Russian President Vladimir Putin chuan Moscow chuan Nato ram te beih tumna a nei lo erawh a ti thung.
He ram, khawvela nuclear ralthuam nei ngah ber pawlin Poland, Baltic states leh Czech Republic te Ukraine ang lo taka Nato member te a bei ang tia ngaihdan awm chu awmze nei lo a ni, tiin Putin chuan a sawi.
Mahse, Ukraine chuan ram dang te airfield chu Western F-16 te warplane thlawhchhuah tir nana a hmang a nih chuan chung hmun te chu beih thiang a ni tawh ang a ti thung.
Russia chuan February 2022 khan Ukraine a run tan a, khawthlang ram te nena an inlaichinna chu Cold War hnua a chhiat ber lai a thleng mek a ni.
Russia-in Ukraine a beih tharlam berah missile leh drone 100 chuang a hmang a, harsatna namen lo a thlen a ni. Tun hnaiah kar hnih chhungin Russia chuan Ukraine beih nan ralthuam turu tak tak hmangin tum hnih a bei tawh a ni.
Ukrainian President Volodymyr Zelensky chuan Russia tactic chu ‘missile terror’ tia sawiin hydro-electric power plant an beih chu an tichhia a nih chuan environmental disaster turu tak a thleng ang tiin a sawi.
Kharkiv mayor chuan Russian beihna avanga electricity neih tha leh tur chuan a thlaa thla a ngai dawn tiin a sawi bawk.
Ukraine hnenah military aid a rang thei ang bera pek ngenin Tusk chuan tun atanga idnona in kum hnih hmel a hmuh leh velah engkim a chiang tawh dawn tiin a sawi a. “Indopui II na tawp hnuah hun pawimawh ber laiah kan cheng mek a ni” tiin a sawi.
European security te inrawlh tura a ngenna chhan sawiin Tusk chuan Russia chuan chuhn engah a tum khat nan hypersonic missile hmangin Kyiv a bei a ni a ti a.
Putin an Moscow Crocus City Hall jihadist tena an beihnaah Ukraine a dem lui tlat chuan Russian president in Ukraine a civil target an beihnaah mahni inthiam tum hlirin chet a lakna leh a inthiamchawpna a ni tiin a sawi.
Tusk chuan Europe chuan Nato structure ni lo adang a siam angai lo tia sawiin chutihrual chuan military lama mahni intodelh zual a nih chuan US nena inkawpna a nghet zual zawk ang tiin a sawi.
Poland chuan Nato target 2% khumin a economic output atangin defence lamah 4% a hmang mek tawh a, European ram dangte chuan target an la pha meuh lo thung.
European Council president hlui ni bawk Tusk chuan tun hma pawhin Europe chu indo inralringin a awm a ngai tiina lo sawi tawh a.
Spain Prime Minister thin Pedro Sanchez chuan EU leaders te chu
summit statement siamah ‘indona’ tih thumal chu thangthar ten vaua inngaihna an nei tia sawiin hmang lo turin a tih thu Tusk chuan a sawi a. Mahse, chhanna a siamah indona chu abstract idea a ni ngawt tawh lo, thil awm dan thlirin thleng thei reng a ni a tih thu a sawi bawk a.
“Chhiatna lam hawi sawina angin a bik takin thangthar zawk te chuan an ngai mai thei a, mahse era thar kan chuangkai tih hi an man a ngai a, chu chu pre-war era a ni” tiin Tusk chuan a sawi.
Kum 2007 atang 2014 inkar chuhnga Polish prime minister a nih hmasak ber khan Poland leh Baltic states hotute tihloh zawng European leader dang te chuan Russia chu a hlauhawm tih an man miah lo a ti bawk a. Europe pumah rilru lamah revolution tak tak a thleng a ngai tiin a sawi bawk.
Hetih lai hian Ukraine commander-in-chief Gen Oleksandr Syrskiy chuan interview a neihnaah frontline ah Russia chuan sipai paruk zelah Ukraine chuan sipai pakhat chauh a nei tiin a sawi a.
Ukraine chuan ammo leh air defence system a ngiat ngawih ngawih te kha dawng thei se chuan a territory laklet leh te a hloh nawn hauh lovang tiin a sawi bawk.
Poland prime minister thusawi chu Baltic states tena an ngaihmawh an sawi reng tawh thin a ni a. Russia in ram dang runa a him tho va, Ukraine ram a awpzui zel theih chuan President Putin chuan an ram chu a run dawn lo tih an sawi thei lo tiin an sawi a. Baltic states te chu tun hmaa Moscow thuhnuaia lo awm tawh an ni bawk si a ni.
Tun hnai lawka president a tum ngana atan inruat leh Vladimir Putin chuan tun hnaiah Nato ram te beih a tum loh thu a sawi a.
Mahse Baltic leader Estonia Prime Minister Kaja Kallas te ang chuan Moscow thusawi chu rin loh tur an ti bur thung. February 2022 a Russia in Ukraine a run hma lawk khan Russia Foreign Minister Sergei Lavrov chuan Khawthlang ram tena Russia in Ukraine runa tum an tih chu hnawlin ‘propaganda’ tih leh ‘Western hyperbole’ a tihsak a nih kha. Mahse, a hnu lawkah rinhlelh ang ngeiin Russia chuan a run zui zat a ni.
Russia-in Ukraine a hneh tur a ni lo – Donald Tusk
![](https://theaizawlpost.org/wp-content/uploads/Clipboard01-446.jpg)