Russia-in Zaporizhzhia region-ah hma an sawn

Russia-in Zaporizhzhia region-ah hma an sawn
Russia chuan an sipaiten Ukraine chhimchhaka Zaporizhzhia region-ah hma an sawn duai niin an sawi a, chenna hmun pahnih an lak belh a, region pum lak tuma beihpui an thlak kal zelah hma lam an pan zel tih an sawi.
Russian sipai aia tlem zawk Ukrainian sipaite chuan Donetsk region-ah pawh nasa taka beihna tawk zelin ral hmatawng chu laipui leh drone hmangin Russian-ten an bei nasa hle.
June thla tawp lama Dnipropetrovsk region an luh hnuah Russian sipaite hian luah chhunzawmin a thenawm, Zaporizhzhia region lak tumin an kalzel a, chawlhkar ruk liam ta chhung khan km 30 velin hma an sawn tawh niin Ukrainian tantu lamin map an siamah pawh tar lan a ni.
Russian defence ministry chuan Pathianni khan Rivnopillya khua an lak thu a sawi a, chhim lama Huliaipole pawh la mai thei dinhmunah dingin an bawh zel bawk tih a sawi a. Sipaite hian Orikhiv atanga km kua chauhva hla, Mala Tokmachka pawh an la niin a sawi bawk.
“Orikhiv hum nan he khua hi eng ang fakauva pawimawh nge a nih sawi a harsa hle zawk a ni,” tiin Mala Tokmachka khua hi Ukraine tan a pawimawh thu Russia-a war blogger lar ber zinga mi, Yuri Podolyaka-a chuan a sawi a. He khua hi ‘gateway to Orikhiv’ ti hialin a sawi.
Russia-in hma an sawn nia an sawi chungchangah hian Ukraine-in engmah sawi an la nei lo va. Kar hmasaah erawh kha chuan an sipai general lawk takin Zaporizhzhia-a inbeihna a nsat thu leh Huliaipole khua velah pawh an dinhmun a khirh hle tih a lo sawi tawh a. Kar hmasa vek khan Kyiv-a sipaite hian khaw eng emaw zat atangin an tawlh kir tih an sawi bawk.
Ukrainian sipai leh an commander tam tak chuan an tanhmun hum turin sipai an ngah tawk lo niin an sawi a, chung lamah drone tam tak thlawhtir chuan khawi lam ve ve pawh hmasawn zung zung turin chet a tihar bawk niin an sawi.
Russia hian Ukraine ram 19% chuang, sq km 1,15,476-a zau a thunun tawh a, hma erawh a sawn chak lovin kum hnih kal ta aiin 1% chauhvin an thunun zau va. Moscow hian Donbas an tih, Donetsk leh Luhansk bakah Kherson leh Zaporizhzhia pum thunun a duh hle a ni.
Tunah hian Zaporizhzhia region bik hi 75% an thunun tawh niin an insawi a, heti a nih chuan Ukraine hian mi nuai sarih chuang chenna, Zaporizhzhia khawpui telin sq km 7,000 vel a la thunun a ni.