Russia khawchhak kilah mi 48 phur thlawhna tla
Russian rescue service-te chuan an ram khawchhak kil, Amur region-ah a tum ram a thlen hma km 16 vela hlaa a awm laia bo thlawhna tla ruang an hmu tawh.
Angara airlines thlawhna, An-24 hian passenger 42 leh thawktu paruk phurin Chinese ramri bul maia Blagoveshchensk chhuahsanin Tynda tumhmun a pan laiin radar atangin a bo tih thuneituten an sawi.
Amur Governor Vasily Orlov chuan thlawhna hmuh a nih theih nan ‘an neih ang zawng zawng an thawh chhuahpui’ tih a sawi a. Thlawhnaah hian naupang panga an chuang tel tih a sawi bawk.
A hnu lawkah Russia-a emergencies ministry chuan Russian civil aviation helicopter-in thlawhna kang khu hluah hluah an hmu tih an puang zui a. Dam an awm an ring lo tih an sawi bawk.
Amur-a civil defence centre chuan thlawhna hi Tynda atanga km 16 chuang hreta hla tlang awihah an hmu tih a puang niin Tass news agency chuan a tar lang.
Thlalak thehdarhah chuan thlawhna hi ramngaw chhah tha takah a khu hluah hluah a, chhanchhuah hna thawktuten a hmun thleng turin darkar khat chuang an bei.
Chhuitute chuan thlawhna khalhtuin a tisual palh nge khawl lam fel lo vang zawka hetiang hi tawng ta tih an chhui mek tih emergency thuneituten an sawi.
An-24 thlawhna hi Russia chhimchhak kil, Khabarovsk atanga thlawk tan niin hmun eng emaw zata a din hnuah tuna a chetsualna hi a thlawh tawpna ber tur a ni.
Angara airlines Antonov 24 thlawhna hi kum 50 dawn ni tawhin tun hma pawhin neuh neuh a lo nei tawh thin nia sawi a ni.
Hetih lai hian tun hnaiah endikna a paltlang vek niin civil aviation authority chuan news agency-te an hrilh a, kum 2018 hnu lama hetiang thlawhnain vawi li a chetsualna a ni.
An-24 thlawhna dangte pawhin chetsualna an lo tawk zauh zauh tawh a. An-24RV chu July, 2019 khan Nizhneangarsk Airport-a a tlankawngah a let a, thawktu pahnih an thi.
Kum 2011 khan Angara An-24 hi Siberia-a Ob luiah tlain a chuang pasarih an thi.
Russia khawchhak kilah mi 48 phur thlawhna tla
