Russia sipai-ah Nepali thahnem tak tang mek

Nepal-ah mi thahnem tak Russia army a Nepali te luhtira thlem thin te man an ni chuan ngaihven a hlawh hle a.
Tunkar tir lam khan Nepal chuan Russia chu Nepali mercenary te Ukraine indonaa tel mek te chu thawn haw turin a ti a, Nepali paruk in nunna an chan tawh a ni.
Heng Nepali te hi smuggler te hian tourist visas hmangin an la chhuak thin a, Russian army ah Nepali engzah nge tang mek hriat theih a ni lo chungin za chuang fe an nia ngaih a ni.
Russia-a Nepal ambassador chuan Russia tan Nepali nationals 150-200 vel indonaah an tel mek a ti a. Heng bakah hian sum duhna avang leh visa residency avangin ni tin Russian sipaia tang tura inziak lut an awm reng tih a ni bawk.
Nepalis te chu Russian army zawm turin an la kal reng a, tam takin hliam an tuar mek a, Russian damdawi inah enkawlin an awm bawk.
Nepal hi khawvela ram rethei ber pawl niin a mipui 40% lawih te chu rethei bakberhin an cheng mek niin World Bank chuan a sawi.
Nepal-in a khua leh tui te foreign army an zawm a rem ti lo va, mahse, phal chin a neih awmin Gurkha sipaite chuan Indian leh British army an zawm a remti thung.
Russia chuan Ukraine nena an inbeihna kal mek zelah sipai tam zawk neih tumin hma a la a. Tun hnaiah pawh Georgia, Syria leh Libya atangin a sipai tur lakna a nei tia sawi a ni.
Sipai laknaah Russia chu phat rual lohin a inhnamhnawih tia finfiahna a awm lo tia sawi a ni chungin Nepal chuan Moscow hnenah Nepali sipaite indonaah hmang lo turin ngenna a siam tlat a, Russian ambassador pawh thu zawhfiah turin a ko tlat si a ni.
Heng Nepalis te hi Russia atangin lehkhathawn hmangin tlawh tura sawmna thawn an ni thin tia sawi a ni a. Chung buaipuitu chu awmin India emaw Dubai paltlangin Russia an zin theihna tura ruahman a ni ta thin tiin sawi a ni bawk.
Thawhtanni khan Nepal thuneitute chuan Ukraine indonaa thi Nepali mi paruk te ruang chu thawn turin Russia a ngen a. Mahse, engmah hmalak zui tak tak theihna a awm chuang lo.
Nepal mi Russia a thi farnu chuan Nepali sorkar chu zangnadawmna pe tur leh a unaupa ruang chu la tura a ngen thu a sawi a. “Thuneitute chuan ruangte chu Russian sipai ten an phum tawh tih min hrilh a. Russian thuneitute nena kan inbiak theih nan min pui tur a ni” tiin a sawi bawk.
June thla daih tawh khan Nepali thalai tam tak te chuan student emaw work visa hmangin Russia an pan a, chutah Russian army an zawm zui thin tia sawi a lo ni tawh a. Sum thawhchhuah leh Russian khua leh tui nihna neih chu an tum ber a ni.
“Tute pawhin Nepal economy dinhmun kan hre vek a. Let leh ngawt ila eng nge kan tih ang,” tiin Nepali mercenary pakhat chuan TikTok video-ah a sawina a awm a ni.
Ukrainian news outlet Kyiv Post pawhin tunkar tir lam khan Ukrainian sipaiah pawh Nepali an awm tiin a sawi bawk a.
International Labour Organization chuan Neplai 3.5 million vel lai ram pawn a bik takin middle East, South East Siia leh India rama hnathawk an awm a ti.