American pathum Russia nena lung in tang inthleng tawna chhuah zalente chuan US leilung an rap ta a, an zingah hian Wall Street Journal reporter Evan Gershkovich pawh a tel.
Kum 32-a upa, Gerschkovich a lung in tang 16 inthleng tawnah telin lung in tang inthleng tawn zingah hian Russia pariat an tel a, Cold War hnua Russia leh Khawthlang ramte lung in tang inthleng tawn turu ber a ni.
Lung in tângte hi Turkey airfield -ah inthleng tawn niin mitang chhuah zingah hian US marine Paul Whelan leh Russian-American journalist Alsu Kurmasheva te pawh an tel a ni.
Gershkovich, Kurmasheva leh Whelan te hi Joint Base Andrews ah phurh thlen an ni a, an chhung ten an lo hmuak a ni.
An pathumin US President Joe Biden leh Vice-President Kamala Harris ten an lo hmuak bawk a. Biden chuan ‘An hrehawm tawrh rapthlak a tawp ta’ tiin a sawi.
Mitangte chhuah an nih theih nan American allies a bik takin Germany leh Slovenia te chungah lawmthu a sawi bawk a. Mitangte chhuah zalen an nihna chu diplomacy lama hlawhtlinna turu tak a ti bawk.
American mitang pathum chhuah zalen te hi Brooke Army Medical Centre, Texas ah medical check-up nei tura hruai nghal an ni.
Mitang inthleng tawn nan hian thla 18 lawih inbiakna kalpui niin Moscow chuan Vadim Krasikov, Berlin park a tualthattu Germany a tang chu chhuah a phut tlat a, a phut angin chhuah zalen a ni ta bawk.
Ram hrang hrang pasariha mitang chhuah zalen te hi an vaiin 24 an ni tiin Turkey presidency chuan a tarlang bawk a. Heng mitang chhuah zalen te hi US, Germany, Poland, Slovenoia, Norway, Russia leh Belarus khua leh tui te an ni hlawm.
Russia-ah pawh President Vladimir Putin chuan mitang chhuah zalen te chu Moscow a Vnukovo Airport-ah lo hmuakin a lo lawm a ni. Mitangte state award pek an nih tur thu a sawi bawk.
Krasikov ruala chhuah zalen zingah Russian nupa Slovenia a spy a puha tantir te telin an fate pahnih nen chhuah zalen an ni a.
Nato leh European Union te pawhin thuchhuah siamin Turkey palai hmanga mitangte chhuah zalen an ni chu lawmawm an tih thu an sawi bawk.
Mitang chhuah zingah hian German khua leh tui Rico Kriger, Belarus-a thi tura a chungthu rel mahse Belarus leader Alexander Lukashenko an a ngaihdam pawh a tel bawk.
A hma chuan lung in tang chhuah tawnah hian Russian opposition leader Alexei Navalny pawh chhuah tur zinga tel a ni a, mahse, February thla khan Artic penal colony-ah a thi ta thut a ni. Navalny nupui Yulia Navalny chuan mitang chhuah zalen te chu lawmawm a tih thu a sawi bawk.
Mitangte chhuah an nih hma ni lawkah Russia-a mitang tam tak journalist tangte pawh huamin an tanna atanga hmun danga sawn an nih avangin mitang chhuah zalen a thleng dawn tia sawi lawk a lo ni tawh bawk a.
Mitang inchhuahsak tawn liantham thleng hnuhnung ber chu December 2022 khan niin US basketball star Brittney Griner chu Abu Dhabi airport-ah Russian arms dealer taewrawt Viktor Bout, American lung in a kum 12 tang tawh nena inthleng tawn a ni a.
Kum 2010 khan Vienna khawpuiah Russian spy 10 US-a tangte leh Russia-a tang double agent pali te chu inthleng tawn a lo ni tawh bawk a.
An zinga pakhat chu Sergei Skripal, military intelligence officer hlui niin kum 2018 khan Salisbury-ah Novichok nerve agent hmangin tihhlum a ni zui ta tho a ni.
Russia-US ten mitang inthleng
